Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 685 Hüküm no: 491 Orijinal metin no: [115a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice’nin, kendisine ait ev ve bağı satıp kendi masraflarına harcayıp oğlu merhum Kaymak Mehmed Kapudan’ın zimmetindeki alacaklarını, varisi olan karısı Ayşe Hanım’dan talep ettiği Mahmiye-i Galata hâricinde Şahkulu mahallesinde sâkin iken bundan akdem vefât eden Kaymak Mehmed Kapudan b. Rıdvanˈın vâlidesi Hadîce bt. Hasan nâm hatun meclis-i şer‘de müteveffâ-yı mezbûrun zevcesi ve terekesine vâzi‘atüˈl-yed olan Âişe Hanım bt. Mehmed mahzarında üzerine da‘vâ ve takrîr-i kelâm edip bundan akdem oğlum müteveffâ-yı mezbûr hayatında Cezîre-i Sakızˈda Yenicâmi mahallesinde vâki‘ ma‘lûmüˈl-hudûd bir mülk menzilimi dört yüz esedî guruşa ve Karayork kasabası bağlarında kezâlik ma‘lûmüˈl-hudûd bir kıt‘a mülk bağımı beş yüz esedî guruşa min-haysüˈl-mecmû‘ dokuz yüz esedî guruşa âhara bey‘ ve kabz-ı semen ve kendi mesârifine sarfla istihlâk edip zimmetinde bana deyn olduğunu alâ-ruûsiˈl-işhâd ikrâr ve işhâd dahi etmekle hâlâ terekesinden taleb ederim suâl olunsun dedikde gıbbeˈs-suâl veˈl-inkâr ve isre-talebiˈl-beyyine udûl-ı Müslimînˈden Sinan Kapudan b. Mehmed ve Halil Beşe b. Hasan li-ecliˈş-şehâde meclis-i şer‘a hâzırân olup isreˈl-işhâd fiˈl-hakīka müteveffâ-yı mezbûr hayatında vâlidem mezbûrenin vech-i muharrer üzere sâlifüˈz-zikr menzil ile bağını dokuz yüz esedî guruşa âhara bey‘ ve kabz-ı semen ve kendi mesârifine istihlâk etmekle meblağ-ı mezbûr dokuz yüz esedî guruş vâlidem mezbûreye zimmetimde deynimdir deyü huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra müdde‘iyye-i mezbûre ba‘deˈt-tahlîf mûcebiyle ba‘deˈl-hükm mâ vaka‘a biˈt-taleb ketb olundu. Fî-gurreti Saferiˈl-hayr li-sene [10]85. Şuhûdüˈl-hâl: Mâ-sebak