Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 686 Hüküm no: 492 Orijinal metin no: [115a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Mehmed Ağa’nın çocuklarına vasî olan karısı Emine’nin, vekili olan kardeşi Osman Çelebi’yi azl edip yerine kocası Mustafa Ağa’yı vekil tayin ettiği Medîne-i Hazret-i Ebâ Eyyûbˈde Câmi‘-i Kebîr mahallesi sükkânından iken bundan akdem vefât eden Mehmed Ağa b. Şeyhiˈnin sulbî oğlu Mustafa Çelebi ve sagīre kızı Fatmaˈnın vâlideleri ve tesviye-i emirlerine kıbel-i şer‘îat-i mergūbede mansûbe vasîleri olan Emine bt. Mehmed meclis-i şer‘-i hatîrde hâlâ zevci fahrüˈl-eşbâh Mustafa Ağa b. Ahmed mahzarında kendi tarafımdan asâleten ve vasîleri olmağla vesâyet-i ikrâr ve takrîr-i kelâm edip mukaddemâ emr-i vesâyete tarafımdan vekîl olup sagīrân-ı mezbûrânın mâllarını i‘mâl ve akāretlerinin icârâtını kabz eden karındaşım işbu hazır biˈl-meclis Osman Çelebi vekâletinden azl edip yerine müşârün-ileyh Mustafa Ağaˈyı vech-i muharrer üzere emr-i vesâyete ve kendi umûruma tarafımdan vekîl nasb ve ta‘yîn eyledim dedikde ol dahi vekâlet-i mezbûreyi kabûl ve hizmet-i lâzımesini edâya müte‘ahhid olmağın mâ vaka‘a biˈt-taleb ketb olundu. Fiˈl-hâmis-i aşer min-Saferiˈl-hayr li-sene hamse ve semânîn ve elf. Şuhûdüˈl-hâl: el-Hâc Ahmed Ağa b. Hasan el-mübâşir, Mehmed Ağa b. Eyüb, Ali Çavuş b. Mehmed, Mustafa Beşe b. Ali, Ahmed Ağa b. Abdullah, Şa‘bân Ağa b. Mehmed, Sebzeci Ali Beşe