Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 691 Hüküm no: 500 Orijinal metin no: [116b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Davud Çelebi’nin, merhum Mehmed Çelebi’nin zimmetindeki sicim bahasından alacağını varislerden talep ettiği İşbu bâ‘isüˈl-vesîka Davud Çelebi b. Bali meclis-i şer‘de mahmiye-i Galataˈya tâbi‘ Kasımpaşaˈda Kādı Mehmed Efendi mahallesinde sâkin iken bundan akdem vefât eden Mehmed Çelebi b. el-Hâc Mehmedˈin verâseti zevce-i metrûkesi Ümmügülsüm bt. Mustafa ile vâlidesi Emine bt. Abdullah nâm hatuna ve sagīr oğlu Mustafa ve sagīre kızı Rukiyeˈye münhasıra oldukdan sonra sagīrân-ı mezbûrânın vasî-i şer‘îleri ceddeleri Meryem bt. Mustafa tarafından husûs-ı âtiˈl-beyâna vekîl-i müsecceli olan Ahmed Ağa b. Ali mahzarında üzerine da‘vâ ve takrîr-i kelâm edip müteveffâ-yı mezbûrun zimmetinde sicim bahâsından yüz sümün hakkım olup meblağ-ı mezbûru kableˈl-istifâ fevt olmağla hâlâ terekesinden taleb ederim suâl olunsun dedikde gıbbeˈs-suâl veˈl-inkâr ve ba‘de talebiˈl-beyyine udûl-ı Müslimînˈden Mahmud Çelebi b. Mehmed ve el-Hâc Mehmed b. Musa li-ecliˈş-şehâde hâzırân biˈl-meclis olup işhâd olunduklarında fiˈl-vâki‘ müteveffâ-yı mezbûr müdde‘î-i mezbûra sicim bahâsından yüz sümün deynim vardır deyü huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ‘itiˈl-kabûl şehâdetleri makbûle oldukdan sonra müdde‘î-i mezbûr ba‘deˈt-tahlîf mûcebiyle ba‘deˈl-hükm mâ vaka‘a biˈt-taleb ketb olundu. Fiˈs-sâmin-i aşer min-Saferiˈl-hayr li-sene hamse ve semânîn ve elf. Şuhûdüˈl-hâl: Mâ-sebak