Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 691 Hüküm no: 499 Orijinal metin no: [116b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülkadir Çelebi’nin, merhum Mehmed Çelebi’nin zimmetindeki alacağını varislerden talep ettiği İşbu bâ‘isüˈr-rakīm Abdülkadir Çelebi b. Hüseyin meclis-i şer‘-i hatîrde mahmiye-i Galataˈya tâbi‘ Kasımpaşaˈda Kadı Mehmed Efendi mahallesinde sâkin iken bundan akdem vefât eden Mehmed Çelebi b. el-Hâc Mehmedˈin verâseti zevce-i metrûkesi Ümmügülsüm bt. Mustafa ile sagīr oğlu Mustafa ve sagīre kızı Rukiyeˈye münhasıra olduğu şer‘an zâhir ve müte‘ayyin oldukdan sonra sagīrân-ı mezbûrânın tesviye-i emirlerine kıbel-i şer‘den mansûbe vasîleri olup tereke-i müteveffâ-yı mezbûra vâzi‘atüˈl-yed olan Meryem bt. Mustafa nâm hatun kıbelinden zikri âtî husûsuna vekîl-i müseccel olan Ahmed Ağa b. Ali mahzarında üzerine da‘vâ ve takrîr-i kelâm edip müteveffâ-yı mezbûrun zimmetinde karzdan seksen esedî guruş hakkımın otuz beş esedî guruşu hayatında yedinden ahz u kabz eyledim bâkī kırk beş esedi guruşumu kableˈl-istifâ fevt olup hâlâ terekesinden taleb ederim vekîl-i mezbûra suâl olunsun dedikde gıbbeˈs-suâl veˈl-inkâr ve ba‘de talebiˈl-beyyine udûl-ı Müslimînˈden el-Hâc Mehmed b. Musa ve Hasan Çelebi b. Habib li-ecliˈş-şehâde meclis-i şer‘a hâzırân olup isreˈl-işhâd fiˈl-hakīka müteveffâ-yı mezbûr hayatında bi-tarîkıˈl-karz bizim huzûrumuzda seksen guruş ref‘ ve teslîm ol dahi kabz ve tesellüm eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra müdde‘î-i mezbûra ba‘deˈt-tahlîf mûcebiyle hüküm birle mâ vaka‘a biˈt-taleb ketb olundu. Fiˈs-sâmin-i aşer min-Saferiˈl-hayr li-sene hamse ve semânîn ve elf. Şuhûdüˈl-hâl: Hasan Efendi b. Abdülgaffar, Sinan Reis b. Mehmed, Osman Çelebi b. Habib, Süleyman Çelebi b. Abdullah, Davud Çelebi