Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 706 Hüküm no: 509 Orijinal metin no: [119b-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hakimin anneleri ölen dört çocuğa vasî atadığı Hazret-i Ebâ Eyüb el-Ensârî -aleyhi rahmeti’l-Bârî- tevâbi‘inden Südlüce mahallesinde sâkine iken bundan akdem vefât eden Ümmühani bt. Ömer Ağa nâm merhûmenin Mustafa, Osman, Râbia ve İsmihan nâm evlâd-ı sıgārının tesviye-i umûruna vasî lâzım olmağın, hâkim-i muvakkı‘-ı a‘lâhü el-mütevakkı‘ rızâi rabbihî ve mevlâhu, sıgār-ı mezbûrînin müteveffât-ı mezbûreden irs-i şer‘le intikāl eden mallarını hıfz ve hallerini zabt için evân-ı rüşd ve hadd-i bulûğlarına değin hâmil-i hâze’l-kitâb Ali Beşe b. İbrahim nâm kimseyi vasî nasb ü ta‘yîn eyledikde ol dahi kabûl ve hizmetini edâyı ta‘ahhüd etmeğin mâ-vaka‘a biˈt-taleb ketb olundu. Cerâ zâlike ve hurrire fi’l-yevmi’s-sâbi‘ min-şehri Rebî‘i’l-evvel li-sene erba‘a ve semânîn ve elf. Şuhûdü’l-hâl: Fahrü erbâbü’t-tahrîr ve’l-kalem Ömer Efendi b. Osman, Mehmed Efendi b. Mehmed el-hatîb, Mehmed Halîfe b. Mehmed el-müezzin, Mustafa Çelebi b. Mehmed, Süleyman Efendi b. Mehmed el-imâm, Ahmed Bey tâbi‘-i Ömer Efendi el-mezbûr