Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 707 Hüküm no: 511 Orijinal metin no: [119b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Ümmühani bt. Ömer’in, cariyesi Kâtibe’yi kızı Rabia’ya hibe etmesi sebebiyle diğer varislerin cariye üzerinde hak iddialarının reddedildiği Medîne-i Hazret-i Ebâ Eyyûbeˈl-Ensârî -aleyhi [rahmetü]ˈl-Bârî- muzâfâtından Hasköy mahallesinde Südlüce nâm karye mahallâtından Mahmud Ağa mahallesinde sâkine iken bundan akdem vefât eden Ümmühani bt. Ömer nâm hatunun sadriye kızı Râbiaˈnın tesviye-i emrine kıbel-i şer‘den mansûb vasî olan Ömer Ağa b. Şa‘bân meclis-i şer‘de müteveffât-ı mezbûrenin sadrî sagīr oğulları Mustafa ve Osman ile sadriye sagīre kızı İsmihanˈın tesviye-i emirlerine kıbel-i şer‘den mansûb vasîleri Ali Beşe [b.] İbrahim mahzarında biˈl-vesâye üzerine da‘vâ ve takrîr-i kelâm edip müteveffât-ı mezbûre Ümmühani silk-i mülk-i sahîhinde münselik olan işbu uzun boylu, açık kaşlı, Rusiyyetüˈl-asl, Kâtibe nâm câriyesini târih-i kitâbdan iki ay mukaddem hâl-i hayatında ve kemâl-i akl-ı sıhhatinde kızı sagīre-i mezbûre Râbiaˈya hîbe-i sahîha-i şer‘iye ile hîbe ve ba‘dehû yine kızı sagīre-i mezbûre içün kendi kabz edip sagīre-i mezbûrenin mülk-i mevhûbu olmuş iken hâlâ mezbûr Ali Beşe câriye-i mezbûreyi müteveffâ-yı mezbûrenin sâir terekesine idhâl murâd eder suâl olunup kasr-ı yedine tenbîh olunmak mutlak biˈl-vesâye matlûbumdur dedikde gıbbeˈs-suâl veˈl-inkâr ve ba‘de talebiˈl-beyyine udûl-ı Müslimînˈden zahrüˈl-ekârim veˈl-emâcid Ömer Efendi b. Şa‘bân ve Ali Çelebi b. Şa‘bân li-ecliˈş-şehâde meclis-i şer‘a hâzırân olup istişhâd olundukda fiˈl-hakīka müteveffâ-yı mezbûr hâl-i hayatında ve kemâl-i akl-ı sıhhatinde târih-i kitâbdan iki ay mukaddem câriye-i memlûkesi olan mezbûre Kâtibeˈyi kızı mezbûre Râbiaˈya bizim huzûrumuzda hîbe-i sahîha-i şer‘iye ile hîbe ve yine sagīre-i mezbûre içün [içün kendi] kendi kabz eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de ri‘âyet-i şerâ’itiˈl-kabûl şehâdetleri makbûle oldukdan sonra mûcebiyle vasî-i mezbûr Ali Beşeˈnin kasr-ı yedine tenbîh birle mâ vaka‘a biˈt-taleb ketb olundu. Fiˈl-yevmiˈs-sâbi‘ min-şehri Rebî‘iˈl-evvel li-sene hamse ve semânîn ve elf. Şuhûdüˈl-hâl: Fahr-ı erbâbüˈt-tahrîr veˈl-kalem Ömer Efendi b. Osman, Mehmed Efendi b. Mehmed el-hatîb, Mehmed Efendi b. Ahmed el-müezzin, Ahmed Bey b. Ömer Efendi Bâyi‘, Süleyman Efendi b. Mehmed el-hatîb, Ali Bey b. Halil, Kuyumcu Ali Çelebi, Yesârî Ali Çelebi