Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 708 Hüküm no: 512 Orijinal metin no: [119b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehnaz bt. Abdullah’ın, merhume Ümmühani’nin beş yıl hizmetle azat ettiği kölesi olduğu ve varislerin kölelik iddilarının reddedildiği İşbu orta boylu, elâ gözlü, Moskoviyyetüˈl-asl bâ‘iset-i hâzeˈl-kitâb Şehnaz bt. Abdullah meclis-i şer‘de Medîne-i Hazret-i Ebâ Eyyûbeˈl-Ensârî muzâfâtından Hasköy kasabasına tâbi‘ Südlüce nâm karyesinden Mahmud Ağa mahallesinde sâkine iken bundan akdem vefât eden Ümmühani bt. Ömer nâm hatunun sadrî sagīr oğulları Mustafa ve Osman ile sadriye sagīre kızları Râbia ve İsmihan tesviye-i emirlerine kıbel-i şer‘den mansûb vasîleri olan babaları Osman Beşe b. İbrahim mahzarında üzerine da‘vâ ve takrîr-i kelâm edip ben müteveffât-ı mezbûrenin câriye-i memlûkesi olup mülkünde olduğum hâlde hâl-i hayatında târih-i kitâbdan iki ay mukaddem oğullarım mezbûrân kızlarım sagīretân-ı mezkûretâna beş sene hizmet etmek üzere beni kefâlete kat‘ etmişken hâlâ mezbûr bana rakīk olmak üzere vaz‘-ı yed eder suâl olunsun dedikde gıbbeˈs-suâl veˈl-inkâr mezbûre Şehnazˈdan beyyine taleb olundukda udûl-ı Müslimînˈden fahrüˈl-emâsil veˈl-a‘yân Ömer Efendi b. Osman ve Ali Çelebi b. Şa‘bân li-ecliˈş-şehâde meclis-i şer‘a hâzırân olup istişhâd olduklarında fiˈl-hakīka müteveffâ-yı mezbûr hâl-i hayatında târih-i kitâbdan iki ay mukaddem sıgār-ı mezkûrelere târih-i kitâbdan beş sene hizmet etmek üzere mezbûre Şehnazˈı bizim huzûrumuzda kitâbete kat‘ eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle olundukdan sonra mûcebiyle ba‘deˈl-hükm mâ vaka‘a biˈt-taleb ketb olundu. Fiˈl-yevmiˈs-sâbi‘ min-şehri Rebî‘iˈl-evvel li-sene hamse ve semânîn ve elf. Şuhûdüˈl-hâl: Ali Çelebi el-yesârî, Mehmed Efendi b. Mehmed el-hatîb, Mehmed b. Ahmed, Süleyman Efendi b. Mehmed el-imâm, Kuyumcu Ali Çelebi b. Ali Beşe el-muhzır, Mehmed Halîfe b. Mehmed el-müezzin, Mustafa Halîfe b. Mehmed el-müezzin, el-Hâc Mustafa b. ( )