Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 710 Hüküm no: 514 Orijinal metin no: [120a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. İbrahim’in annesi merhume Şehnaz’ın, merhum Osman Efendi’den alacaklı olduğu parasını beytülmal emininden talep ettiği İşbu bâ‘isetüˈl-vesîka Fatma bt. İbrahim nâm hatun tarafından zikri câ’î husûsa vekîl olup mezbûrenin zâtını ma‘rifet-i şer‘le ârifân el-Hâc Ali b. İsmail ve Veli Yazıcı b. Mehmed şehâdetleriyle şer‘an vekâleti sâbite olan zevci Ebûbekir b. Ali meclis-i şer‘de mahmiye-i Galataˈya tâbi‘ kasaba-i Fındıklıˈda Pürtelaş Hasan mahallesinde sâkin iken bundan akdem vefât eden Osman Efendiˈnin zâhirde vâris-i ma‘rûfu olmamağla terekesi cânib-i beytü’l-mâle isâbet etmeğin hâlâ mahmiye-i mezbûrede emîn-i beytü’l-mâl olup tereke-i müteveffâ-yı mezbûra biˈl-emâne vâzi‘uˈl-yed olan Mehmed Ağa b. Ali mahzarında biˈl-vekâle üzerine da‘vâ ve takrîr-i kelâm edip müteveffâ-yı mezbûrun zevcesi olup kendiden mukaddem vefât eden anam Şehnaz bt. Abdullah nâm hatun hâl-i hayatında müteveffâ-yı mezbûra ikrâz ve teslîm ettiği kırk esedî guruşu kableˈl-istifâ fevt olup hâl-i hayatında mezbûr Osman Efendi meblağ-ı mezbûr vech-i muharrer üzere bana deyni olduğunu huzûr-ı Müslimînˈde ikrâr ve işhâd dahi etmekle hâlâ emîn-i mezbûrdan taleb ederim suâl olunsun dedikde gıbbeˈs-suâl veˈl-inkâr ve ba‘de talebiˈl-beyyine udûl-ı Müslimînˈden Mustafa Efendi b. Hüseyin ve Şa‘bân b. Murad nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīka müteveffâ-yı mezbûr Osman Efendi hayatında müdde‘iyye-i mezbûre Fatmaˈya anasından müntakil olup istikrâz ettiğim kırk esedî guruş zimmetimde deynimdir deyü huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra müvekkile-i mezbûre Fatma aleˈl-vechiˈl-meşrû‘ tahlîfden sonra mûcebiyle hüküm birle mâ vaka‘a biˈt-taleb ketb olundu. Fiˈl-hâmis min-şehri Rebî‘iˈl-evvel li-sene hamse ve semânîn ve elf. Şuhûdüˈl-hâl: İbrahim Çelebi b. Abdülbaki, Mustafa Beşe b. Abdullah, Mahmud Beşe b. Mehmed, Ahmed Beşe b. Osman