Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 718 Hüküm no: 524 Orijinal metin no: [122a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cinane’nin, merhume kızı Ümmügülsüm’den kendisine intikal eden tereke hissesini, vasî Mahmud Efendi’den teslim aldığı Mahmiye-i İstanbulˈda İbrahim Paşa-yı Atîk mahallesi sâkinelerinden iken bundan akdem vefât eden Ümmügülsüm nâm sagīrenin verâseti zevc-i metrûku Abdullah nâm sagīr ile vâlidesi Cinâne bt. Abdullah nâm hatuna münhasıra olduğu şer‘an mütehakkık oldukdan sonra mezbûre Cinâne meclis-i şer‘-i hatîr-i lâzımüˈt-tevkīrde zevc-i mezkûr Abdullahˈın babası ve cânib-i şer‘den tesviye-i emrine vasîsi olan râfi‘-i hâzeˈl-kitâb Mahmud Efendi b. Rasûl mahzarında ikrâr-ı tâm ve takrîr-i kelâm edip sadriye kızım müteveffât-ı mezbûre Ümmügülsümˈün muhallefâtından biˈl-irsiˈş-şer‘ yedimizde olan defter-i kassâm-ı askerî nâtık olduğu vech üzere bana isâbet ve intikāl eden hisse-i irsiyemi vasî-i mezbûr Mahmud Efendi yedinden biˈt-tamam veˈl-kemâl ahz u kabz eyledim ba‘deˈl-yevm muhallefât-ı müteveffât-ı mezkûrede vechen mineˈl-vücûh ve sebeben mineˈl-esbâb hak ve alâkam kalmayıp husûs-ı mezbûra müte‘allika vasî-i mezkûr Mahmud Efendi ile da‘vâ ve nizâ‘ım kalmadı dedikde zabten liˈl-mekāl mâ vaka‘a biˈt-taleb ketb olundu. Fiˈl-yevmiˈt-tâsi‘-i aşer min-şehri Rebî‘iˈl-evvel li-sene hamse ve semânîn ve elf. Şuhûdüˈl-hâl: Mustafa Ağa b. ( ) mübâşir, Ömer b. Ahmed, Mahmud Ağa b. Ahmed, Hasan Efendi b. ( ), İsa Beşe b. Yusuf