Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 726 Hüküm no: 532 Orijinal metin no: [124a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime bt. Veli’nin, kocası merhum Mustafa Kapudan zimmetindeki alacağını vasî İsmail Çelebi’den talep ettiği Mahmiye-i Galataˈya tâbi‘ Kasımpaşaˈda el-Hâc Hasan mahallesinden olup işbu sene-i mübârekede tarîk-i hâcc-ı şerîfde vefât eden el-Hâc Mustafa Kapudan [b.] İbrahimˈin verâseti zevce-i metrûkesi Rahime bt. Veli ile sagīr oğlu Mustafa Çelebiˈye ve sagīre kızı Âişeˈye münhasıra olduğu şer‘an zâhir ve müte‘ayyin oldukdan sonra işbu râfi‘a-i hâzeˈl-kitâb mezbûre Rahime meclis-i şer‘-i hatîrde sagīrân-ı mezbûrânın vasî-i muhtârları olmağla tereke-i müteveffâ-yı mezbûre vâzi‘uˈl-yed olan İsmail Çelebi b. Veli mahzarında üzerine da‘vâ ve takrîr-i kelâm edip zevcem müteveffâ-yı mezbûrun zimmetinde ma‘kūdun-aleyh olan yüz esedî guruş hakkımı kableˈl-istifâ fevt olup hâl-i hayatında meblağ-ı mezbûr bana deyni olduğunu alâ-ruûsiˈl-işhâd ikrâr ve işhâd dahi etmekle hâlâ vasî-i mezbûrdan taleb ederim suâl olunsun dedikde gıbbeˈs-suâl veˈl-inkâr ve isre talebiˈl-beyyine udûl-ı Müslimînˈden el-Hâc Veli b. Ramazan ve el-Hâc Mahmud b. el-Hâc Şa‘bân ve el-Hâc İbrahim b. el-Hâc Ali nâm kimesneler li-ecliˈş-şehâde meclis-i şer‘a hâzırûn olup gıbbeˈl-istişhâd fiˈl-vâki‘ müteveffâ-yı mezbûr hayatında zevcem işbu Rahime nâm hatunun yüz esedî guruşu zimmetimde deynimdir deyü bizim huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâ’itiˈl-kabûl şehâdetleri makbûle oldukdan sonra müdde‘iyye-i mezbûre ba‘deˈt-tahlîfiˈl-mu‘teber mûcebiyle hüküm birle mâ vaka‘a biˈt-taleb ketb olundu. Fiˈl-hâmis-i aşer min-şehri Rebî‘iˈl-evvel li-sene hamse ve semânîn ve elf. Şuhûdüˈl-hâl: es-Sâbıkūn