Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 738 Hüküm no: 539 Orijinal metin no: [125b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saime bt. Abdullah’ın, kocası merhum Naathân Ali Çelebi’nin çocuklarına vasi, merhumun kardeşleri Ahmed ve Ali Çelebilerin ise vasiye nâzır tayin edildikleri Medîne-i Hazret-i Ebâ Eyyûbüˈl-Ensârî radıye anhü Rabbuhi’l-Bârîˈde Takyecibaşı mahallesinde sâkin iken bundan akdem vefât eden Naathân Ali Çelebi b. Mehmedˈin sulbî sagīr oğulları Halil ve Mehmed ve sulbiye sagīre kızı Hadiceˈnin evân-ı rüşd ve hadd-i bulûğlarına değin her hâllerini hıfz ve emvâl-i mûriselerini zabt içün bir vasî lâzım ve mühim olmağın sagīrûn-ı mezbûrûnun vâlideleri işbu sahibetüˈl-kitâb Saime [bt.] Abdullah nâm hatun vesâyete lâyık ve her vecihle eytâmın tesviye-i umûrlarını kemâ-yenbagî ikāmete ehil idüği ahbâr-ı ahyâr-ı sahîhüˈl-kelimât ile müte‘ayyin olmağla hâkim-i muvakki‘-i sadr-ı kitâb medd-i fâzıla ve meddüˈd-dühûr veˈl-ahkâb hazretleri dahi mezbûre Saimeˈyi evlâd-ı sıgār-ı merkūme üzerlerine vasî nasb ve ta‘yîn edip ol dahi vesâyet-i mezbûreyi ve hizmet-i lâzımesini edâya ta‘ahhüd ve iltizâm eylediğinden sonra hâkim-i mûmâ-ileyh merkūmenin li-eb karındaşları Ahmed Çelebi b. el-mezbûr ve Ali Çelebi dahi vasî-i mezbûr üzerine hasbî nâzır nasb ve ta‘yîn buyurup ol dahi nezâret-i mezbûreyi kabûl ve merâsimden edâya müte‘ahhid olmağın mâ vaka‘a biˈt-taleb ketb olundu. Fiˈl-yevmiˈt-tâsi‘ veˈl-işrîn min-şehri Rebî‘iˈl-evvel li-sene hamse ve semânîn ve elf. Şuhûdüˈl-hâl: Salih Efendi b. Mehmed, Receb Efendi b. Yusuf el-imâm, Mehmed Çelebi b. Abdülaziz, Ivaz Bey b. Ali, Ahmed Çelebi b. Emrullah, İsa Bey, Hüseyin Çelebi b. Ali