Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 742 Hüküm no: 542 Orijinal metin no: [126a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Mehmed Çelebi’nin, Rüstem Bey zimmetindeki alacağının, varislerin vekili aracılığıyla tahsil edildiği Mahmiye-i Galata tevâbi‘inden kasaba-i Kasımpaşaˈda Kādı Mehmed Efendi mahallesinde sâkin iken bundan akdem vefât eden Mehmed Çelebi b. el-Hâc Mehmedˈin sulbî sagīr oğlu Mustafa ile sagīre kızı Rukiyeˈnin tesviye-i emirlerine kıbel-i şer‘den mansûb vasîleri olan ceddeleri Meryem bt. Mustafa nâm hatunun vekîl-i müsecceli olan Ahmed Ağa b. Ali meclis-i şer‘-i şerîfde işbu bâ‘isüˈl-vesîka Rüstem Bey b. ( ) mahzarında biˈl-vekâle üzerine da‘vâ ve takrîr-i kelâm edip müteveffâ-yı mezbûrun merkūm Rüstem Bey zimmetinde yedinden müşterâ ve makbûz ağ ve iplik ve mantar ve isparçine semenlerinden yirmi bir bin altı yüz altmış akçe hakkı olup meblağ-ı mezbûrun üç bin altı yüz seksen akçesini müteveffâ-yı mezbûr hayatında mezbûr Rüstem Bey yedinden alıp kabz edip bâkī on yedi bin dokuz yüz seksen akçe hakkını merkūm Rüstem Beyˈden kableˈl-istifâ fevt olmağla hâlâ biˈl-vekâle merkūm Rüstem Beyˈden taleb ederim suâl olunsun dedikde gıbbeˈs-suâl ve akībeˈl-inkâr merkūm Rüstem Bey cevâbında fiˈl-hakīka müteveffâ-yı mezbûre bâkī merkūm zimmetimde deynim iken meblağ-ı mezbûrdan on dört bin dört yüz akçeyi müteveffâ-yı mezbûra biˈd-defâ‘at teslîm ol dahi ba‘deˈt-teslîm ancak zimmetimde üç bin beş yüz seksen akçe deynim kalmışidi deyü def‘le mukābele edicek gıbbeˈl-istintâk veˈl-inkâr mezbûr Rüstem Beyˈden def‘-i mezkûruna beyyine taleb olundukda udûl-ı Müslimînˈden Ömer Çelebi b. Ali ve es-Seyyid Mustafa Çelebi b. Mehmed ve Mustafa Yazıcı b. Mehmed ve Mehmed b. Ali nâm kimesneler li-ecliˈş-şehâde meclis-i şer‘a hâzırûn olup isreˈl-istişhâd fiˈl-vâki‘ müteveffâ-yı mezbûr hayatında merkūm Rüstem Beyˈden biˈd-defâ‘at on dört bin dört yüz akçeyi alıp kabz eyledim deyü huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘deˈt-ta‘dîl veˈt-tezkiye şehâdetleri makbûle oldukdan sonra mûcebiyle ikrârı olan üç bin beş yüz seksen akçeyi vekîl-i mezbûra edâya merkūm Rüstem Beyˈe ba‘deˈt-tenbîh meblağ-ı mezbûr on dört bin dört yüz akçe mutâlebesinden vekîl-i mezbûr [126b] Ahmed Ağa men‘ olundukdan sonra mezbûr Ahmed Ağa mezkûr Rüstem Bey mahzarında biˈl-vekâle ikrâr edip edâsına tenbîh olunan meblağ-ı mezbûr üç bin beş yüz seksen akçeyi biˈl-vekâle merkūm Rüstem Bey yedinden tamamen ahz u kabz eyledim dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈl-yevmiˈs-sâlis min-şehri Rebî‘iˈl-âhir li-sene hamse ve semânîn ve elf. Şuhûdüˈl-hâl: Mustafa Ağa b. Hızır, Ömer Efendi b. Ali, İshak Çelebi b. Hasan, Hüseyin Çelebi b. Ali, Ahmed b. Osman