Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 743 Hüküm no: 543 Orijinal metin no: [126b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Abdullah’ın, varissiz ölen Hasan Kapudan’ın azatlı kölesi olduğundan beytülmal emininin kölelik iddiasının reddedildiği İşbu uzun boylu, sarışın, Rusiyyüˈl-asl râfi‘üˈl-vesîka Mustafa b. Abdullah meclis-i şer‘-i şerîfde mahmiye-i Galata muzâfâtından kasaba-i Kasımpaşaˈda Çatma Mescid mahallesinde sâkin iken bundan akdem vefât eden Hasan Kapudan b. Hüseyinˈin zâhirde vâris-i ma‘rûfu olmamak ile muhallefâtı cânib-i beytü’l-mâle râci‘ olmağla hâlâ mahmiye-i mezbûre ve tevâbi‘inden emîn-i beytü’l-mâl olup hâlâ tereke-i müteveffâ-yı mezbûra vâzi‘uˈl-yed olan Mehmed Ağa b. Ali mahzarında üzerine da‘vâ ve takrîr-i kelâm ben müteveffâ-yı mezbûrun abd-i memlûku olup mülkünde olduğu hâlde bir buçuk sene mukaddem beni hasbeten lillâh-i te‘âlâ huzûr-ı Müslimînˈde tedbîr-i mutlak ile müdebber ve ikrâr ve Müslimînˈi işhâd edip hâlâ vefât etmekle ve terekesinin sülüsü kıymete müsâ‘id olmağla ben hür olmuş iken emîn-i mezbûr bana rık olmak üzere vaz‘-ı yed murâd eder suâl, sebîlim tahliye ve üzerimden yed-i âdiyesi nez‘ olunması matlûbumdur dedikde gıbbeˈs-suâl ve akībeˈl-inkâr mezbûr Mustafa müdde‘asına müsbite beyyine taleb olundukda udûl-ı ricâlden Câmi‘-i Kebîr müezzini Ramazan Çelebi b. el-Hâc Abdullah ve el-Hâc Hasan b. Zülfikar ve Mehmed Çelebi b. İbrahim ve Osman b. Hasan nâm kimesneler li-ecliˈş-şehâde meclis-i şer‘a hâzırûn olup eserüˈl-istişhâd fiˈl-vâki‘ müteveffâ-yı mezbûr bir buçuk sene mukaddem hasbeten lillâh-i te‘âlâ abd-i memlûku olan gulâm-ı mezbûr Mustafaˈyı bizim huzûrumuzda tedbîr-i mutlak ile müdebber edip ve bizi işhâd ettikden sonra hâlâ vefât edip ve terekesinin sülüsü dahi mezbûr Mustafaˈnın kıymetine müsâ‘id olmağla mezbûr Mustafa sâir ahrâr gibi hür olmuşdur biz bu husûsa bu vech üzere şâhidleriz şehâdet dahi ederiz deyü edâ-i şehâdet-i şer‘iye eylediklerinde gıbbe ri‘âyet-i şerâ’itiˈl-kabûl şehâdetleri makbûle oldukdan sonra mûcebiyle hüküm birle mâ vaka‘a biˈt-taleb ketb olundu. Fiˈl-yevmiˈs-sânî-i aşer min-şehri Rebî‘iˈl-âhir li-sene hamse ve semânîn ve elf. Şuhûdüˈl-hâl: Fahrüˈl-eimme Osman Efendi b. Şükrullah el-imâm, el-Hâc Mustafa b. Hasan, Receb Kapudan b. Mehmed, Mahmud Beşe b. Rıdvan, Hasan b. Abdullah, Mustafa Çelebi b. Mehmed, Mustafa b. Şa‘bân