Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 748 Hüküm no: 549 Orijinal metin no: [127a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirci Osman Çelebi’nin, varissiz ölen Kemanî Hasan Kapudan’ın zimmetindeki esir bahasından alacağını beytülmal emininden talep ettiği Mahmiye-i İstanbulˈda Salih Paşa mahallesinde sâkin Esirci tâifesinden işbu bâ‘isüˈl-vesîka Osman Çelebi b. Mehmed meclis-i şer‘-i şerîfde mahrûse-i Galata ve tevâbi‘inden kasaba-i Kasımpaşaˈda Çatma Mescid mahallesinde sâkin iken bundan akdem vefât eden Kemânî Hasan Kapudan b. Hüseyinˈin zâhirde vâris-i ma‘rûfu ol[ma]mak ile muhallefâtı cânib-i [beyt]ülmâle râci‘ olmağın hâlâ mahrûse-i mezbûre ve tevâbi‘i emîn-i beytü’l-mâlı olup müteveffâ-yı mezbûrun terekesine biˈl-emân vâzi‘uˈl-yed olan Mehmed Ağa b. Ali [127b] üzerine da‘vâ ve takrîr-i kelâm bundan akdem müteveffâ-yı merkūme nakid bin yirmi esedî guruş ikrâz ve tesellüm ol dahi ba‘deˈl-istikrâz veˈt-tesellüm cinsi ve evsâfı beynimizde ilm-i şer‘î ile ma‘lûme ve yedinden müşterâ ve makbûz on üç nefer esirler semenlerinden bin elli dokuz kıt‘a esedî guruş ki cem‘an iki bin yetmiş dokuz esedî guruş hakkımı kableˈl-ahz veˈl-istifâ vefât edip lâkin müteveffâ-yı mezbûr hayatında meblağ-ı mezbûr iki bin yetmiş dokuz esedî guruş zimmetinde bana deyni olduğunu alâ ruûsiˈl-işhâd ikrâr ve işhâd dahi ettikden sonra mâ‘adâ târih-i kitâb-ı şehrinin sekizinci gününde kasaba-i mezbûrede hilâfe-mevlâ olan Osman Efendi huzûrunda dahi ikrâr ve mûcibince yedime hüccet-i şer‘iye almışidim deyü hüccet-i şer‘iye ibrâz ve emîn-i mezkûr mûcibince feth ü kırâet ve istintâk olundukda emîn-i mezbûr Mehmed Ağa cevâbında tereke-i müteveffâ-yı mezbûra vaz‘-ı yedini ikrâr lâkin deyn-i mezbûru biˈl-külliye inkâr edicek müdde‘î-i mezbûr Osman Çelebiˈden müdde‘âsını müsbite beyyine taleb olundukda udûl-ı Müslimînˈden olup kasaba-i mezbûrede el-Hâc Ferhad mahallesinde sâkin Ramazan Çelebi b. Mehmed ve Yeldeğirmeni mahallesinde sâkin Mehmed Çelebi b. Hüseyin Kapudan ve Süleyman Kapudan b. Mehmed nâm kimesneler li-ecliˈş-şehâde meclis-i şer‘a hâzırân olup eserüˈl-işhâd fiˈl-hakīka müteveffâ-yı mezbûr hayatında müdde‘î-i mezbûra vech-i muharrer üzere bin yirmi esedî guruş karz ve bin elli dokuz esedî guruş on üç nefer kâfir esirler semenleri ki min-haysüˈl-mecmû‘ iki bin yetmiş dokuz esedî guruş zimmetimde deynimdir deyü bizim huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘deˈt-ta‘dîl veˈt-tezkiye şehâdetleri makbûle oldukdan sonra müdde‘î-i mezbûr Osman Çelebi aleˈl-vechiˈl-meşrû‘ tahlîf olunmağın mûcebiyle hüküm birle mâ vaka‘a biˈt-taleb ketb olundu. Fiˈt-tâsi‘-i aşer min-şehri Rebî‘iˈl-âhir li-sene hamse ve semânîn ve elf. Şuhûdüˈl-hâl: Ramazan Çelebi b. el-Hâc Abdullah, Süleyman Çelebi b. el-Hâc Mehmed, Ali Çelebi b. İsmail, el-Hâc Hasan Ağa b. Abdurrahman, İsmail Çelebi b. Yusuf, Ahmed Çelebi el-münâdî, Hüseyin Çelebi b. Ali, Ali Bey b. Halil