Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 747 Hüküm no: 548 Orijinal metin no: [127a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şahin b. Abdullah’ın, varissiz ölen Hasan Kapudan’ın azatlı kölesi olduğundan beytülmal eminini kölelik iddiasının reddedildiği İşbu orta boyla, sarı bıyıklı, gök elâ gözlü, Rusiyyüˈl-asl Şahin b. Abdullah meclis-i şer‘-i şerîfde mahmiye-i Galata muzâfâtından kasaba-i Kasımpaşaˈda Çatma Mescid mahallesinde sâkin iken bundan akdem vefât eden Hasan Kapudan b. Hüseyinˈin zâhirde vâris-i ma‘rûfu olmamak ile muhallefâtı cânib-i beytü’l-mâle râci‘ olmakla hâlâ mahmiye-i mezbûre ve tevâbi‘inde emîn-i beytü’l-mâl olup hâlâ tereke-i müteveffâ-yı mezbûrede biˈl-emâne vâzi‘uˈl-yed olan Mehmed Ağa b. Ali mahzarında üzerine da‘vâ ve takrîr-i kelâm edip ben müteveffâ-yı mezbûrun abd-i memlûku olup mülkünde olduğum hâlde üç sene mukaddem beni hasbeten lillâh-i te‘âlâ huzûr-ı Müslimînˈde tedbîr-i mutlak ile müdebber ve ikrâr ve Müslimînˈi işhâd edip hâlâ vefât etmekle ve terekesinin sülüsü kıymetime müsâ‘id olmağla ben hür olmuş iken emîn-i mezbûr bana rık olmak üzere vaz‘-ı yed murâd eder suâl olunup sebîlim tahliye ve üzerimden yed-i âdiyesi nez‘ olunması matlûbumdur dedikde gıbbeˈs-suâl ve akībeˈl-inkâr müdde‘î-i mezbûrdan müdde‘âsını müsbite beyyine taleb olundukda udûl-ı ricâlden Depebaşıˈnda sâkin İbrahim Çelebi b. Ali ve Ali Çelebi b. İsmail nâm kimesneler li-ecliˈş-şehâde meclis-i şer‘a hâzırân olup eserüˈl-istişhâd fiˈl-vâki‘ müteveffâ-yı mezbûr hâl-i hayatında üç sene mukaddem hasbeten lillâh-i te‘âlâ abd-i memlûku olan gulâm-ı mezbûru bizim huzûrumuzda tedbîr-i mutlak ile müdebber edip ve bizi işhâd ettikden sonra hâlâ vefât edip ve terekesinin sülüsü dahi mezbûr Şahinˈin kıymetine müsâ‘id olmağla mezbûr Şahin sâir ahrâr gibi hür olmuşdur biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâ’itiˈl-kabûl şehâdetleri makbûle oldukdan sonra mûcebiyle hüküm birle mâ vaka‘a biˈt-taleb ketb olundu. Fiˈl-hâmis-i aşer min-şehri Rebî‘iˈl-âhir li-sene hamse ve semânîn ve elf. Şuhûdüˈl-hâl: Receb Kapudan b. Mehmed, İbrahim Çelebi b. Abdülbaki, Mustafa b. Mehmed, Mustafa b. Şa‘bân, Mustafa b. Abdullah, Hüseyin Çelebi b. Ali