Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 755 Hüküm no: 553 Orijinal metin no: [128b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Varissiz ölen Kemanî Hasan Kapudan’ın evi, borçları sebebiyle beytülmal emini tarafından Osman Çelebi’ye satıldığı Mahmiye-i Galata tevâbi‘inden kasaba-i Kasımpaşaˈda Çatma Mescid mahallesinde sâkin iken vefât eden Kemânî Hasan Kapudan b. Hüseyinˈin zâhirde vâris-i ma‘rûfu olmamak ile muhallefâtı cânib-i beytü’l-mâle râci‘ olmağın hâlâ mahmiye-i mezbûre ve tevâbi‘i emîn-i beytü’l-mâl olup biˈl-fi‘il tereke-i müteveffâ-yı mezbûre biˈl-emâne vâzi‘uˈl-yed olan fahrüˈl-emâsil veˈl-a‘yân Osman Ağa b. Mehmed meclis-i şer‘-i hatîrde işbu sahibüˈl-vesîka Osman Çelebi b. Mehmed mahzarında ikrâr-ı tâm ve takrîr-i kelâm edip müteveffâ-yı mezbûrun düyûnu terekesine müstağraka olup tereke-i menkūlesi düyûn-ı müsbetesine vefâ etmemek ile emlâkinden olup işbu (...?) sudûruna silk-i mülk-i sahîhinde münselik olan mahalle-i mezbûrede vâki‘ bir tarafdan Kerîme bt. Hasan nâm hatun mülküne ve bir tarafdan mahalle-i mezbûre müezzinine meşrûta olan vakıf menzile ve bir tarafdan ba‘zan Tabbâğ Mustafa mülküne ve ba‘zan tarîk-i hâssa ve bir tarafdan tarîk-i âmma müntehî vakf-ı muhavvâta dâhiliyesinde tabaka-i ulyâda iki bâb fevkānî oda ve bir sofa ve bir kenîfi ve tabaka-i vüstâda iki bâb oda ve iki sofa ve bir matbahı ve süflâda iki mahzen ve bir kenîf ve ayazma ve hadîkayı ve muhavvâta hâricinde iki bâb fevkānî oda ve bir sofa ve bir bâb tahtânî oda ve bir üserâ zindânını ve bir kenîf ve bir zât-ı eşcâr-ı müsmire ve gayr-ı müsmireyi hâvî bağçeyi ve iki zokak kapısını müştemil mülk menzilinin dahi bey‘ olunması lâzım gelmeğin hâssa münâdîlerinden Ahmed Çelebi b. Mehmed el-münâdî yediyle yirmi gün sûk-ı sultânîde vesâir mecma‘-ı nâs olan mevâzi‘de beyneˈt-tâlibîn nidâ ve müzâyede ve ba‘deˈl-inkitâ‘iˈr-rağbe beş yüz elli esedî guruşda mezbûr Osman Çelebi üzerinde karâr ve ziyâde ile tâlib-i âhar zuhûr etmediğinden gayrı meblağ-ı mezbûr beş yüz elli yedi guruş menzil-i mezbûrun semen-i misli olduğunu zeyl-i vesîkada esâmîleri mastûre olan sikāt-ı sahîhüˈl-kelimât Müslimîn haber vermeleriyle mütebeyyin oldukdan sonra menzil-i mahdûd-ı mezbûru bi-cümletiˈt-tevâbi‘ veˈl-levâhık ve kâffe-i menâfi‘ veˈl-merâfık meblağ-ı mezbûr beş yüz elli esedî guruşa biˈl-izniˈş-şer‘î emânetim hasebiyle merkūm Osman Çelebiˈye bi-safkatin vâhidetin tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ve teslîm edip ol dahi iştirâ ve kabûl ve tesellüm ettikden sonra semeni olan meblağ-ı mezbûr beş yüz elli esedî guruşa müşteri-i mezbûr Osman Çelebiˈnin müteveffâ-yı mezbûr Hasan Kapudan zimmetinde olup hâlâ huzûr-ı hâkimde isbât ve tereke-i müteveffâ-yı mezbûrdan edâsına hükm-ı şer‘î lâhık olan iki bin yetmiş dokuz esedî guruşun beş yüz elli esedî guruşuna biˈl-emâne takās ve mezbûr Osman Çelebi dahi mukāssa ve kabûl etmekle ba‘deˈl-yevm menzil-i mahdûd-ı merkūm mezkûr Osman Çelebiˈnin mülk-i müşterâsıdır hasbe mâ yeşâ’ ve yahtâr mutasarrıf olsun dedikde gıbbeˈt-tasdîkiˈş-şer‘iˈl-mu‘teber ve mâ vaka‘a biˈt-taleb ketb olundu. Fiˈl-işrîn min-şehri Rebî‘iˈl-âhir li-sene hamse ve semânîn ve elf. Şuhûdüˈl-hâl: Umdetüˈl-eşbâh el-Hâc Hasan Efendi b. Zülfikar, el-Hâc Hasan Bey b. Abdurrahman, Küçük Mehmed Çelebi er-râcil, Ramazan Çelebi b. el-Hâc Abdullah, Süleyman Çelebi b. el-Hâc Mehmed, İbrahim Efendi Kâtib-i beytü’l-mâl, Hasan Çelebi b. İshak, Ömer Efendi b. Ali, Ali Çelebi b. İsmail, İsmail Beşe b. Yusuf, Muharrerüˈl-hurûf el-Hâc Mehmed, Hüseyin Çelebi b. Ali, Ali Bey b. Halil, Ahmed Çelebi b. Osman, Mehmed b. Ahmed