Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 759 Hüküm no: 557 Orijinal metin no: [129a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şaban b. Mustafa’nın, merhum Mahmud Beşe’nin akrabası olduğu, beytülmal emininin Şaban’ın tereke hissesinin vermesi Mahmiye-i Galata tevâbi‘inden kasaba-i Tophâneˈde Ekmekçibaşı mahallesinde sâkin işbu sahibüˈl-kitâb Şa‘bân b. Mustafa meclis-i şer‘-i şerîfde mahmiye-i mezbûre ve tevâbi‘i beytü’l-mâli olup zikri câ’î muhallefâta vâzi‘uˈl-yed olan Mehmed Ağa b. Ali mahzarında üzerine da‘vâ ve takrîr-i kelâm edip mahalle-i mezbûrede sâkin iken bundan akdem vefât eden marîz Mahmud Beşe b. Mehmedˈin zâhirde zevce-i metrûkesi Fatma bt. Abdullahˈdan gayrı vâris-i ma‘rûfu olmamak zu‘mıyla terekesinin sülüs-ı erba‘anı emîn-i mezbûr Mehmed Ağa vâzi‘uˈl-yed olmuş idi hâlâ ben müteveffâ-yı mezbûrun mukarrun-leh biˈn-neseb cihetinden vârisi olup hâl-i hayatında minvâl-i muharrer üzere kendinin vâris olduğunu huzûr-ı Müslimînˈde ikrâr ve işhâd etmekle emîn-i merkūmun vâzi‘uˈl-yed ettiği selâse-i erbâ‘ı terekeyi emîn-i mezkûrdan taleb ederim suâl olunsun dedikde gıbbeˈs-suâl emîn-i mezbûr Ahmed Ağa cevâbında müteveffâ-yı mezbûrun selâse-i erbâ‘ı terekesine vaz‘-ı yedini ikrâr lâkin müdde‘î-i mezbûrun vech-i meşrûh üzere müteveffâ-yı merkūma verâsetini inkâr edicek müdde‘î-i mezbûrdan verâsetine beyyine taleb olundukda yine mahalle-i mezbûre sâkinlerinden Mehmed Çelebi b. Kurd ve Ahmed Çelebi b. Mahmud el-müezzin nâm kimesneler li-ecliˈş-şehâde meclis-i şer‘a hâzırân olup istişhâd olunduklarında fiˈl-hakīka müteveffâ-yı mezbûr hayatında mezbûr Şa‘bân benim vârisimdir ve merkūmdan gayrı vârisim yokdur ve terekenin selâse-i erbâ‘ına müstehıkkadır deyü huzûrumuzda ikrâr ve bizi işhâd edip musırratan alâ-ikrârihî vefât etmekle tereke-i mezkûrenin selâse-i erbâ‘ına mezbûr Şa‘bân müstahıktır biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘deˈt-ta‘dîl veˈt-tezkiye şehâdetleri makbûle oldukda mûcebiyle mezbûr Şa‘bânˈın verâsetine ba‘deˈl-hükm vâzi‘uˈl-yed olduğu selâse-i erbâ‘ı terekeyi merkūm Şa‘bânˈa edâya emîn-i mezbûra tenbîh birle mâ vaka‘a biˈt-taleb ketb olundu. Fiˈl-işrîn min-şehri Rebî‘iˈl-âhir li-sene hamse ve semânîn ve elf. Şuhûdüˈl-hâl: Mustafa Çelebi b. Receb el-imâm, el-Hâc Mahmud b. Murad el-hakkâk, Ramazan Beşe b. İslâm, Ali Çelebi b. Halil, Hüseyin Çelebi b. Ali