Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 758 Hüküm no: 556 Orijinal metin no: [129a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gazanfer b. İslam’ın, merhum İbrahim b. Mehmed’in amcası olduğu, kendisine isabet eden hisseyi vasî Ömer Beşe’den aldığı Vilâyet-i Anadoluˈda Bolu sancağında Gölbazarı kasabasına tâbi‘ Hoca Bekirli nâm karyeden Gazanfer b. İslâm nâm kimesne meclis-i şer‘-i hatîrde medîne-i Hazret-i Eyüb mahallâtından Nazperver mahallesinde sâkin iken bundan akdem vefât eden İbrahim b. Mehmedˈin verâseti anası İsmihan bt. Abdullah ile li-ebeveyn kız karındaşı Havvaˈya ve li-eb kız karındaşı Hadîce ve li-ebeveyn ammi mezbûr Gazanferˈe münhasıra olup kableˈl-kısme mezbûre Havva dahi vefât edip verâseti anası mezbûre İsmihan ile li-eb kız karındaşı merkūme Hadiceˈye ve amm-i mezkûr Gazanferˈe münhasıra olduğu şer‘an zâhir ve müte‘ayyin oldukdan sonra mezbûr Hadiceˈnin tesviye-i emrine kıbel-i şer‘den mansûb vasiyyesi olmağla müteveffâ-yı mezbûrânın terekelerine vâzi‘uˈl-yed olan işbu bâ‘isüˈl-kitâb Ömer Beşe b. Cumhur mahzarında ikrâr ve takrîr-i kelâm edip müteveffât-ı mezbûrânın terekelerinden ber-mûceb-i defter-i kassâm-ı askerî mülk menzilinde olan hissemizden mâ‘adâ tereke-i menkūlelerinden benim hisse-i şer‘iyeme intikāl ve isâbet eden sekiz bin elli bir akçeye vasî-i mezbûr Ömer Beşe vâzi‘uˈl-yed olmağın ben dahi müteveffât-ı mezbûrânın vech-i muharrer üzere li-ebeveyn ammi olduğumu nakl-i şer‘î ile huzûr-ı hâkimde ba‘deˈl-isbât verâsetime hükm-ı şer‘î lâhık olmuş idi elhâletü hâzihî tereke-i menkūleden benim hisseme isâbet eden meblağ-ı mezbûr sekiz bin elli bir akçeyi vasî-i mezbûr Ömer Beşe yedinden tamamen alıp kabz edip menzil-i mezbûrda olan hîbe-i şer‘iyesine sarf mâ‘adâ vasî-i mezbûr Mehmed Beşe yedine vechen mineˈl-vücûh hak ve alâkam kalmadı dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈl-işrîn min-şehri Rebî‘iˈl-evvel li-sene hamse ve semânîn ve elf. Şuhûdüˈl-hâl: Osman Çavuş b. Ahmed el-mübâşir, el-Hâc Mustafa Çelebi b. Osman, Mehmed Murad Bey b. Abdülmennan, Hasan Çelebi b. İshak, Ali b. Osman, Ömer Efendi b. Ali