Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 763 Hüküm no: 560 Orijinal metin no: [129b-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hakimin babası ölen İsmail Çelebi adlı çocuğa nafaka takdir ettiği Mahmiye-i Galata tevâbi‘inden Kasımpaşa kasabası mahallâtından Acıçeşme mahallesinde sâkine iken bundan akdem vefât eden el-Hâc Osman nâm kimsenin İsmail Çelebi nâm sagīr oğluna müteveffâ-yı mezbûrdan müntakil muhallefâtdan külle yevm nafaka ve kisve-bahâ ve sâir havâic-i lâzıme için kadr-ı kifâye meblağ farz ve takdîr olunmasını, sagīr-i merkūmun Hamide bt. Ahmed nâm annesi taleb etmeğin, hâkim-i muvakkı‘ a‘lâhü el-mütevakkı‘ rızâi rabbihî ve mevlâhu dahi sagīr-i mezkûra nafaka ve kisve-bahâ için mal-ı mûrisden zeylde mezkûr târihden külle yevm râyicü’l-vakt dört akçe farz ve takdîr edip meblağ-ı mefrûzu sagīr-i mezbûrun havâicine sarfa ve vakt-i zarûretde istidâne ve hîn-i zaferde rücû‘a mezbûre Hamide hatuna izin birle mâ-vaka‘a biˈt-taleb ketb olundu. Cerâ zâlike ve hurrire fi’l-yevmi’r-râbi‘ min-Cumâdelûlâ li-sene hamse ve semânîn ve elf. Şuhûdü’l-hâl: Mustafa Ağa b. Hızır, Hüseyin b. Yusuf, Molla İbrahim b. Mustafa, Hüseyin Çelebi b. İshak, Şaban b. Ali, İsa Bey b. Halil