Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 769 Hüküm no: 564 Orijinal metin no: [130a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beytülmal emini, merhume Ayşe bt. Abdullah’tan beytülmala kalan yarım ev hissesini kocası Mahmud Beşe’ye sattığı Mahmiye-i Galata tevâbiʽinden kasaba-i Tophâneˈde Ebufazl mahallesinde sâkine iken bundan akdem vefât eden Âişe bt. Abdullah nâm hatunun zevc-i metrûku Mahmud Beşe b. Mehmedˈden gayrı zâhirde vâris-i maʽrûfu olmamağla terekesinin nısfı zevc-i mezbûre ve nısf-ı âharı cânib-i beytü’l-mâle râciʽ oldukdan sonra hâlâ mahmiye-i mezbûre ve tevâbiʽi emîn-i beytü’l-mâl olup zikri ca’î nısf menzile vâziʽüˈl-yed olan Mehmed Ağa b. Ali meclis-i şerʽde işbu bâʽisüˈl-vesîka Mahmud Beşe mahzarında biˈl-emâne ikrâr ve takrîr-i kelâm edip müteveffât-ı mezbûrenin mahalle-i mezbûrede vâkiʽ bir tarafdan Mustafa Kapudan mülküne ve bir tarafdan Safiye nâm hatun mülküne ve bir tarafdan Mehmed Reis mülküne ve bir tarafdan tarîk-i âmma müntehî iki bâb fevkānî ve iki bâb tahtânî odaları ve bir tahta bend ve bir sofayı ve bir kenîfi ve bir ahırı müştemil mülk menzilin [130b] nısfı cânib-i beytü’l-mâle ve nısf-ı âharı zevc-i mezbûr Mahmud Beşeˈye intikāl ve isâbet etmekle menzil-i mezbûrun nısf-ı şâyiʽ-i mezbûru hâssa münâdîlerinden Mustafa Çelebi b. Yusuf yediyle sûk-ı sultânîde beyneˈt-tâlibîn nidâ ve müzâyede olundukdan sonra yedi bin beş yüz akçede merkūm Mahmud Beşe üzerinde karâr ve ziyâde tâlib-i âhar olmamağla menzil-i mezbûru biˈl-izniˈş-şerʽî meblağ-ı mezbûr yedi bin beş yüz akçeye mezbûr Mahmud Beşeˈye tarafeynden îcâb ve kabûlü hâvî beyʽ-i bâtt-ı sahîh-i şerʽî ile biˈl-emâne beyʽ ve teslîm edip ol dahi iştirâ ve tesellüm eyledikden sonra semeni olan meblağ-ı mezbûr yedi bin beş yüz akçeyi merkūm Mahmud Beşeˈnin yüz elli guruş müsbet hakkının yedi bin beş yüz akçe hakkına takās edip ol dahi mukāssa ve kabûl eyledikden sonra nısf menzil-i mezbûr mezkûr Mahmud Beşeˈnin mülk-i müşterâsıdır hasbemâ’ yeşâ’ mutasarrıf olsun dedikde gıbbeˈt-tasdîkiˈş-şerʽî mâ vakaʽa biˈt-taleb ketb olundu. Fiˈs-sâlis veˈl-işrîn min-şehri Rebîʽiˈl-âhir li-sene hamse ve semânîn ve elf. Şuhûdüˈl-hâl: Mehmed Efendi b. Mustafa el-imâm, Ahmed Çelebi b. Muslı, İbrahim b. Muslihiddin el-müezzin, Durmuş b. Hüseyin, Hasan Efendi b. Abdullah, Ömer Efendi b. Ali