Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 770 Hüküm no: 565 Orijinal metin no: [130b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Beşe’nin, karısı merhume Ayşe bt. Abdullah’ın zimmetindeki alacağını beytülmal emininden talep ettiği Mahmiye-i Galata tevâbiʽinden kasaba-i Tophâneˈde Ebufazl mahallesinde sâkine iken bundan akdemvefât eden Âişe bt. Abdullah nâm hatunun zevc-i metrûku işbu bâʽisüˈl-vesîka Mahmud Beşe b. Mehmed meclis-i şerʽde mahmiye-i mezbûre ve tevâbiʽi emîn-i beytü’l-mâl olan Mehmed Ağa b. Ali mahzarında üzerine daʽvâ ve takrîr-i kelâm edip zevcim müteveffât-ı mezbûrenin benden gayrı zâhirde vâris-i maʽrûfu olmamak ile terekesinin nısfı bana nısf-ı âharı cânib-i beytü’l-mâle â’id olmağın müteveffât-ı mezbûre hâl-i hayatında emriyle menziline harc ettiğim yüz elli esedî guruş hakkımı kableˈl-istifâ vefât edip hatta meblağ-ı mezbûr zimmetinde bana deyni olduğunu alâ-ruûsiˈl-işhâd ikrâr ve işhâd dahi etmekle hâlâ taleb ederim suâl olunsun dedikde gıbbeˈs-suâl ve akībeˈl-inkâr ve baʽde talebiˈl-beyyine udûl-ı ricâlden Mehmed Çelebi b. el-Hâc Yusuf ve Mehmed Çelebi b. el-Hâc Yusuf nâm kimesneler li-ecliˈş-şehâde meclis-i şerʽa hâzırân olup eserüˈl-istişhâd ve fiˈl-vâkiʽ müteveffât-ı mezbûre hâl-i hayat ve kemâl-i akl-ı sıhhatinde tasarrufât-ı şerʽiyyesi bâhire olduğu hâlde zevcim merkūm Mehmed Beşeˈye vech-i meşrûh üzere meblağ-ı mezbûr yüz elli esedî guruş deynim vardır deyü huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şerʽiyye eylediklerinde baʽdeˈt-taʽdîl veˈt-tezkiye şehâdetleri makbûle oldukdan sonra müddeʽî-i mezbûr Mahmud Beşe baʽdeˈt-tahlîf mûcebiyle hüküm birle mâ-vakaʽa biˈt-taleb ketb olundu. Fiˈs-sâlis veˈl-işrîn min-şehri Rebîʽiˈl-âhir li-sene hamse ve semânîn ve elf. Şuhûdüˈl-hâl: es-Sâbıkūn