Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 773 Hüküm no: 1007 Orijinal metin no: [119b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Atâullah Ağa’nın, evini Hatice Hanım bt. Mehmed’e sattığı Husûs-ı âti’l-beyânın mahallinde tahrîri iltimâs olunmağın kıbel-i şer‘den irsâl olunan mevlânâ Mehmed Efendi b. Abdülbâkī umdetü’l-emâsil ve’l-akrân Atâullah Ağa’nın Mahmiye-i İstanbul’da İshak Paşa mahallesinde sâkin olduğu menziline varıp zeyl-i rakīmde mektûbü’l-esâmî olan müslimîn huzûrunda akd-i meclis-i şer‘-i hatîr eyledikde mahmiye-i mezkûrda Pîrî Efendi mahallesinde sâkin Abdi Çelebi b. Yusuf nâm kimesne meclis-i ma‘kūd-ı mezbûrda zikr olunan İshak Paşa mahallesine sâkine Hatice Hanım bt. Mehmed Bey tarafından husûs-ı câi’z-zikre vekîl olduğu mezbûrenin zâtını ma‘rifet-i şer‘iyye ile ârifân olan Ali Bey b. Rıdvan ve Bayram b. Abdullah nâm kimesneler şehâdetleri ile şer‘an sâbit olan mûmâ-ileyh Atâullah Ağa mahzarında ikrâr ve takrîr-i kelâm edip zikr olunan Pîrî Efendi mahallesinde vâki‘ bir tarafdan zikr olunan Pîrî Efendi mescidi ve bir tarafdan Bayram Paşa bostanı ve bir tarafdan Hatice Hâtun mülkü ve bir tarafdan tarîk-i âm ile mahdûd bir bâb fevkānî oda ve bir sofa ve bir bâb tahtânî oda ve bir kenîf ve havluyu müştemil mülk menzilimi cümle hukūk ve merâfıkı ile müvekkile-i mezkûre Hatice Hanım’a fıddî-i râyic fi’l-vakt yirmi bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûr yirmi bin akçeyi müvekkile-i mezbûre yedinden tamâmen ahz u kabz eyledim ba‘de’l-yevm menzil-i mahdûd-ı mezkûr merkūme Hatice Hâtun’un mülk-i müşterâsıdır keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Abdi b. Mehmed ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâmin min Şevvâli’l-mükerrem li sene seb‘a ve seb‘în ve elf. Şuhûdü’l-hâl: İlyas Ağa b. Ali, Hasan Ağa b. Abdullah, Şeyh Mehmed Çelebi b. Abdullah, Osman Çelebi b. Abdullah, Ali Bey b. Rıdvan, Osman Bey b. İbrahim, Mahmud Bey b. Bayezid.