Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 773 Hüküm no: 1008 Orijinal metin no: [119b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayni Hatun bt. Sefer’in kocasıyla müşterek vakıf arsa payını mütevelli izni ile kocasına devrettiği Mahmiye-i İstanbul’da Hocapaşa mahallesinde sâkine Aynî Hâtun bt. Sefer mahfil-i kazâda işbu bâ‘isü’l-kitâb zevci Ali Beşe b. Ömer mahzarında ikrâr ve takrîr-i kelâm edip mahalle-i mezbûrede vâki‘ merhûm Defterdâr İbrahim Efendi vakfı’ndan olup iki tarafdan vakf-ı mezbûr ve bir tarafdan Hoca Hayreddin Hanı ve bir tarafdan tarîk-i hâs ile mahdûd icâre-i mu‘accele-i ma‘lûme ve ayda yirmi iki akçe ücret-i müeccele ile ale’l-iştirâki’s-seviy zevcim mezbûr Ali Beşe ile mutasarrıf olduğumuz arsada olan nısf hissemi mezbûr Ali Beşe’ye izn-i mütevellî ile iki bin akçe bedel mukābelesinde ferâğ ve tefvîz ol dahi tefevvuz ve kabûl eyledikden sonra bedel-i mezbûrun bin yedi yüz akçesini zevcim mezbûr Ali Beşe yedinden ahz u kabz edip bâkī zimmetinde üç yüz akçe hakkım kalmışdır ba‘de’l-yevm arsa-i mezbûrede alâka ve medhalim yokdur dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Fahrü’l-eşbâh Eyüb Ağa b. ( ), Abdi Çelebi b. Mehmed, Mehmed Bey b. Abdullah, İbrahim Çelebi b. Ahmed.