Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 799 Hüküm no: 592 Orijinal metin no: [136b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Ayşe bt. Ali’nin malının üçte birini techiz, tekfin ve hayır işlerine harcaması için es-Seyyid Mehmed Çelebi’yi vasî tayin ettiği Mahmiye-i Galata muzâfâtından kasaba-i Tophâneˈde Firuzağa mahallesinde sâkine iken bundan akdem vefât eden Âişe bt. Hümaˈnın verâseti zevc-i metrûku Mustafa Beşe b. Ali ile vâlidesi Âişe bt. Aliˈye münhasıra ve sadrî kebîr oğlu Mehmed ve sadrî sagīr oğlu Mustafaˈya münhasıra olduğu şer‘an zâhir ve müte‘ayyin oldukdan sonra işbu bâ‘isüˈl-kitâb es-Seyyid Mehmed Çelebi b. Süleyman meclis-i şer‘-i hatîrde mezbûre Fatmaˈda kıbel-i şer‘-i mutahhardan sagīr-i mezbûr Mustafaˈnın tesviye-i emrine mansûb vasî olan Mehmed Çelebi b. Ali mahzarında üzerlerine da‘vâ ve takrîr-i kelâm edip müteveffât-ı mezbûre hâl-i marazında bi-emrillâhi te‘âlâ vefât edersem terekemin sülüsü ifrâz olunup techîz tekfînime ve eyyâm-ı mu‘tâdede tabh-ı ta‘âm olunup it‘âm-ı fukarâ-yı Müslimîn oluna deyü huzûr-ı Müslimînˈde vasiyet ve ikrâr ve Müslimînˈi işhâd ve tenfîziyyesine vasî-i muhtâr nasb ü ta‘yîn ve ben dahi ba‘deˈl-kabûl mezbûre Âişe musırraten alâ-ikrârihâ vefât etmekle hâlâ müteveffât-ı mezbûrenin terekesinin sülüsü biˈl-vesâye mezbûre Fatma ile mezbûr Mehmedˈden vâzi‘uˈl-yed oldukları terekeden taleb ederim suâl olunsun dedikde gıbbeˈs-suâl veˈl-inkâr mezbûrân cevâblarında tereke-i müteveffât-ı mezbûre vaz‘-ı yedini ikrâr lâkin vesâyet-i mezbûreyi inkâr edicek vasî-i mezbûrdan müdde‘âsına beyyine taleb olundukda udûl-ı ricâlden Hüseyin Odabaşı b. Ali ve Yusuf nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīka müteveffât-ı mezbûre hâl-i marazında bi-emrillâhi te‘âlâ vefâtımdan sonra terekemin sülüsü ifrâz olunup techîz-i tekfînime ve eyyâm-ı müte‘adede tabh-ı ta‘âm fukarâ-yı Müslimîn oluna deyü huzûrumuzda vasiyet ve ifrâz ve tenfîziyesine mezbûr Mehmed Çelebiˈyi vasî-i muhtâr nasb ü ta‘yîn eyledi ol dahi ba‘deˈl-kabûl musırraten alâ-ikrârihâ vefât eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâ’itiˈl-kabûl şehâdetleri makbûle oldukdan sonra mûcebiyle ba‘deˈl-hükm mâ-vaka‘a biˈt-taleb ketb olundu. Fiˈl-yevmiˈs-sâlis-i aşer min-şehri Cumâdelûlâ li-sene hamse ve semânîn ve elf. Şuhûdüˈl-hâl: Ömer Efendi b. Ali, İsa b. Halil, Hüseyin Çelebi b. Ali, Mehmed b. Osman