Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 805 Hüküm no: 598 Orijinal metin no: [137a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beytülmal emininin, merhume Mâhî Hatun’un kocası ve akrabası hakkında açtığı terekeden mal saklama davasında haksız olduğu Mahmiye-i Galata hâricinde kasaba-i Kasımpaşaˈda Bedreddin Bey mahallesinde sâkin iken bundan akdem vefât eden Mâhî bt. Rüstem nâm hatunun verâseti zevci metrûku Hüseyin b. Recebˈden gayrı zâhirde vâris-i ma‘rûfu olmamağla terekesinin nısfı cânib-i beytü’l-mâle ve nısf-ı âharı zevc-i merkūm Recebˈe isâbet etmekle hâlâ mahmiye-i mezbûre ve tevâbi‘i emîn-i beytü’l-mâlı olup müteveffât-ı mezbûrenin terekesinin nıfsına biˈl-emâne vâzi‘uˈl-yed olan Mehmed Bey b. Ali meclis-i şer‘de müteveffât-ı mezbûrenin zevc-i merkūm Hüseyin ile rebîbi Ali Çelebi b. Hüseyin mahzarında üzerlerine da‘vâ ve takrîr-i kelâm edip müteveffât-ı mezbûrenin mûcib-i defter-i kassâm-ı askerî terekesini kabz ettiklerinden sonra eşyâ-i memlûkesinden dört bin akçe ve bir yorgan ve iki tencere ve beş sahan ve bir leğen ibrik ve bir kebe ve bir kilim ve iki şamʻdân ve üç lengerî ve ba‘zı eşyâ-i ma‘lûmesi ketm ü ihfâ etmeleriyle hâlâ biˈl-emâne meblağ-ı mezbûr ile eşyâ-i [137b] mezbûrenin nısfını mezbûrlardan taleb ederim suâl olunup alıverilmesi matlûbumdur dedikde gıbbeˈs-suâl ve akībeˈl-inkâr ve ba‘de talebiˈl-beyyine emîn-i mezbûr ityân-ı beyyineden izhâr-ı acz ve istihlâk etmeğin fiˈl-hakīka müteveffât-ı mezbûrenin meblağ-ı mezbûr ile eşyâ-i mezkûresini vesâir ism-i mâl ıtlâk olunur terekesini ketm ve ihfâ etmediklerine mezbûrâna yemîn teklîf olundukda anlar dahi hasebüˈl-mesûl yemîn-i billâhiˈl-aliyyüˈl-a‘lâ edicek mûcebiyle bilâ-beyyine emîn-i mezbûr mu‘ârazadan men‘ olunup mâ hüveˈl-vâki‘ biˈt-taleb ketb olundu. Fiˈl-yevmiˈl-hâmis-i aşer min-şehri Cumâdelûlâ li-sene hamse ve semânîn ve elf. Şuhûdüˈl-hâl: Ömer Efendi b. Ali, Hasan Efendi b. İshak, İsa Beşe, Hüseyin Çelebi b. Ali, Mehmed b. Mehmed, Ahmed b. Osman, Musa b. Ali