Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 815 Hüküm no: 610 Orijinal metin no: [138b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasî Sâliha bt. İbrahim’in, oğlu Süleyman’ın nafaka ve diğer ihtiyaçlarına terekeden harcama yapması için izin istediği Mahmiye-i Galata tevâbi‘inden nefs-i İstinyeˈde sâkine Sâliha bt. İbrahim nâm hatun meclis-i şer‘-i şerîfde takrîr-i kelâm edip işbu sadrî oğlum Süleyman nâm sagīre babası el-Hâc Mehmedˈin babası el-Hâc Osmanˈın mu‘takı el-Hâc Ali ve oğlu Ahmedˈin terekelerinden intikāl ve isâbet eden mal-ı mevrûsundan sagīr-i mezbûra kadr-ı kifâye nafaka ve kisve-bahâ farz ve takdîr olunması matlûbumdur dedikde hâkim-i muvakki‘-i sadr-ı kitâb tûbâ-lehû ve hüsnü-meâb hazretleri sagīr-i mezbûrun mal-ı mevrûsundan nafaka ve kisvesi’çün târih-i kitâbdan külle yevm beş akçe farz ve takdîr edip vakt-i zarûretde istidâne ve hîn-i zaferde rücû‘a mezbûre Sâliha Hatunˈa izin birle mâ vaka‘a biˈt-taleb ketb olundu. Fiˈl-hâmis-i aşer min-Cumâdelûlâ li-sene hamse ve semânîn ve elf. Şuhûdüˈl-hâl: Osman Çelebi b. el-Hâc Yusuf, Mehmed Çelebi b. Yahya, İslâm Çelebi b. Ahmed, Mustafa Çelebi b. Ali, Hüseyin Çelebi b. Ali el-muhzır, Ahmed Beşe b. Osman