Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 816 Hüküm no: 611 Orijinal metin no: [139a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ömer b. Halil’in varislerinin, Mustafa Beşe’ye açtıkları kayık davasında haksız oldukları Fiˈl-asl Anadoluˈda Amasra kazâsına tâbi‘ Tekyeönü nâm karyede sâkin iken bundan akdem vefât eden Ömer b. Halilˈin verâseti zevce-i metrûkesi Döndü bt. Receb ile li-ebeveyn er karındaşları İsa Bey ve Mustafa ve vâlidesi Ünzile bt. Yusuf nâm hatuna ve li-ebeveyn kız karındaşı Sürûrî ˈye münhasıra olduğu şer‘an zâhir ve müte‘ayyin oldukdan sonra mezbûre Döndü ile merkūm İsa Bey meclis-i şer‘de işbu bâ‘isüˈl-vesîka mezbûr Mustafa Beşe mahzarında üzerine da‘vâ ve takrîr-i kelâm edip müteveffâ-yı mezbûrun mülkü olan on iki arşın bir kayığın mecmû‘una merkūm Mustafa Beşe nâ-hak vaz‘-ı yed eder suâl olunsun dedikde gıbbeˈs-suâl mezbûr Mustafa Beşe cevâbında zikrolunan kayığı müteveffâ-yı mezbûr hayatındayirmi bir buçuk esedî guruşa bana bâtten bey‘ ve teslîm ve ben dahi ba‘deˈl-iştirâ veˈt-tesellüm ve def‘-i semen mülk-i müşterâm olmağla vaz‘-ı yed ederim deyü def‘le mukābele edicek gıbbeˈl-istintâk veˈl-inkâr mezbûr Mustafa Beşeˈden def‘-i mezkûruna beyyine taleb olundukda udûl-ı Müslimînˈden Musa Beşe b. Şa‘bân ve Fazlı Beşe b. Şahbâli nâm kimesneler li-ecliˈş-şehâde meclis-i şer‘a hâzırân olup eserüˈl-istişhâd fiˈl-vâki‘ müteveffâ-yı mezbûr hayatında zikrolunan kayığı bizim huzûrumuzda mezbûr Mustafaˈya yirmi bir buçuk esedî guruşa bâtten bey‘ ve teslîm edip ol dahi ba‘deˈl-iştirâ veˈt-tesellüm ve def‘-i semen eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra mûcebiyle bî-vech ta‘arruzdan mezbûrlar men‘ olunup mâ vaka‘a biˈt-taleb ketb olundu. Fiˈl-hâmis veˈl-işrîn min-Cumâdelûlâ li-sene hamse ve semânîn ve elf. Şuhûdüˈl-hâl: Rasûl Beşe b. Gülâbî, Dursun Beşe b. Şa‘bân, Şa‘bân Beşe b. Fazlı, Bali Beşe b. Mehmed, Receb b. Mehmed, Hüseyin b. Ali