Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 831 Hüküm no: 625 Orijinal metin no: [141a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Çelebi’nin, merhum Yusuf Beşe’nin zimmetindeki alacağını varislerden talep ettiği Mahmiye-i İstanbulˈda Saray-ı Atîk kurbünde Sofî Mehmed Paşa mahallesinde sâkin işbu bâ‘isüˈl-kitâb Osman Çelebi b. Ahmed meclis-i şer‘-i enverde mahmiye-i Galataˈya tâbi‘ kasaba-i Kasımpaşaˈda Yeldeğirmeni mahallesinde sâkin iken bundan akdem vefât eden el-Hâc Yusuf Beşe b. Abdullahˈın verâseti zevce-i metrûkesi Safiye bt. Abdullah ile sulbî kebîr oğlu Mustafaˈya ve sagīr oğulları Halil ve Abdullahˈa münhasıra olduğu şer‘an zâhir ve müte‘ayyin oldukdan sonra sagīrân-ı mezbûrânın tesviye-i emirlerine kıbel-i şer‘den mansûbe vasîleri ve vâlideleri mezbûre Safiye mahzarında üzerine da‘vâ ve takrîr-i kelâm edip târih-i kitâbdan bir buçuk sene mukaddem müteveffâ-yı mezbûra iki yüz [141b] kırk yedi buçuk esedî guruş ikrâz ol dahi istikrâz eyledikden sonra meblağ-ı mezbûrun elli guruşunu hayatında ahz u istifâ edip bâkī kalan yüz doksan yedi buçuk guruşu kableˈl-istifâ fevt hâl-i hayatında meblağ-ı bâkī bana deyni olduğunu huzûr-ı Müslimînˈden ikrâr etmekle hâlâ taleb ederin suâl olunsun dedikde gıbbeˈs-suâl ve akībeˈl-inkâr ve ba‘de talebiˈl-beyyine udûl ve ricâlden İbrahim Bey b. Mehmed ve Receb Bey b. Habib nâm kimesneler li-ecliˈş-şehâde meclis-i şer‘a hâzırân olup eserüˈl-istişhâd fiˈl-hakīka müteveffâ-yı mezbûr el-Hâc Yusuf bizim huzûrumuzda müdde‘î-i mezbûr Osman Çelebiˈden târih-i kitâbdan bir buçuk sene mukaddem iki yüz yedi buçuk esedî guruş istikrâz ve kabz eyledim deyü bizim huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz her biri edâ-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra meblağ-ı bâkī yüz doksan yedi buçuk guruşdan küllen ve ba‘zan ahz u istifâ ve biˈl-havâle veyâ turûk-ı şer‘iyeden bir tarîkle zimmetini ibrâ’ etmediğine mezbûr Osman Çelebiˈye yemîn teklîf olundukda ol dahi hasebüˈl-mesûl yemîn-i billâh-i te‘âlâ etmeğin mûcebiyle hüküm birle mâ vaka‘a biˈt-taleb ketb olundu. Fiˈl-yevmiˈr-râbi‘-i aşer min-Cumâdelâhire li-sene hamse ve semânîn ve elf. Şuhûdüˈl-hâl: Mehmed Çelebi b. Hüseyin Kapudan, Mehmed b. Sefer, İsa Beşe b. Halil, Ahmed b. Osman