Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 830 Hüküm no: 624 Orijinal metin no: [141a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zünnun Ağa ve Ömer Ağa Vakıfları mütevellisi Osman Çelebi’nin, merhum Yusuf Beşe’nin vakıflara olan borcunu varislerden talep ettiği Mahmiye-i İstanbulˈda vâki‘ merhûm Zünnûn Ağa ve Ömer Ağa Vakıflarına mütevellî olan bâ‘isüˈl-kitâb Osman Çelebi b. Ahmed meclis-i şer‘de mahmiye-i Galata muzâfâtından kasaba-i Kasımpaşaˈda Yeldeğirmeni mahallesinde sâkine iken bundan akdem vefât eden el-Hâc Yusuf Beşe b. Abdullah nâm kimesnenin verâseti zevce-i metrûkesi Safiye bt. Abdullah ile sulbî kebîr oğlu Mustafaˈya ve sagīr oğulları Halil ve Abdullahˈa münhasıra olduğu şer‘an zâhir ve müte‘ayyin oldukdan sonra kendi tarafından asıl ve sagīrân-ı mezbûrânın kıbel-i şer‘den mansûb vasîleri olup tereke-i müteveffâ-yı mezbûra vâzi‘atüˈl-yed olan merkūme Safiye ile Mustafa mahzarlarında biˈt-tevliye üzerlerine da‘vâ ve takrîr-i kelâm edip müteveffâ-yı mezbûr hayatında vakfeyn-i mezbûreyne mütevellî oldukda vakfeyn-i mezbûreynin asıl malları olan cem‘an yedi yüz esedî guruş makbûzum olup hatta meblağ-ı mezbûru biˈt-tevliye huzûr-ı Müsliminde kabz ettikden sonra mücehhelen vefât edip yerine ben mütevellî nasb ve ta‘yîn olunmağla hâlâ terekesine vâzi‘atüˈl-yed olan mezbûrândan meblağ-ı mezbûru biˈt-tevliye taleb ederim suâl olunsun dedikde gıbbeˈs-suâl veˈl-inkâr ba‘de talebiˈl-beyyine udûl-ı Müslimînˈden İbrahim Bey b. Mehmed ve Mehmed b. Sefer ve Receb Bey b. Habib nâm kimesneler meclis-i şer‘a hâzırûn olup isreˈl-istişhâd fiˈl-hakīka müteveffâ-yı mezbûr hayatında vakfeyn-i mezbûreyne mütevellî oldukda asl-ı mâl vakfeyn olmak üzere meblağ-ı mezbûr yedi yüz guruşu bizim huzûrumuzda biˈt-tevliye kabz edip hâlâ meblağ-ı mezbûr el-Hâc Yusuf mücehhelen vefât etmekle mütevellî-i mezbûr Osman Çelebi içün hakk-ı taleb vardır biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra mûcebiyle hüküm birle mâ vaka‘a biˈt-taleb ketb olundu. Fiˈl-yevmiˈr-râbi‘-i aşer min-Cumâdelâhire li-sene 1085. Şuhûdüˈl-hâl: Mehmed b. Sefer el-bevvâbüˈs-sultânî, Mehmed Çelebi b Hüseyin Kapudan, İsa Beşe b. Halil