Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 845 Hüküm no: 636 Orijinal metin no: [143b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş b. Mehmed’in, merhum Ömer Beşe’nin amcası olduğu ve beytülmal eminin el koyduğu terekedeki hissesini talep ettiği Fiˈl-asl Vilâyet-i Anadoluˈda vâki‘ Pirize kazâsına tâbi‘ Halevel nâm karyeden olup hâlâ mahmiye-i Galataˈ[da] [Yeni]köy nâm karyede sâkin işbu bâ‘isüˈl-vesîka Derviş b. Mehmed nâm meclis-i şer‘-i şerîfde yine karye-i mezbûreden olup Boğdan diyârında ticâret üzere iken bundan akdem vefât eden el-Hâc Ömer Beşe b. Hasanˈın terekesine zâhirde vâris-i ma‘rûfu olmamak zu‘miyle vâzi‘uˈl-yed olan yeniçeri beytü’l-mâli emîni olup karye-i mezbûrede serdâr olan Mehmed Ağa b. Ahmed ile zevce-i menkûhası Âişe Hatun bt. İbrahim mahzarlarında üzerlerine da‘vâ ve takrîr-i kelâm ben müteveffâ-yı mezbûr el-Hâc Ömerˈin babası merkūm Hasan ile li-ebeveyn karındaşı olup terekesinin rub‘ı zevcesi mezbûre Âişeˈye ve sülüs-ı erbâ‘ı bana isâbet ve intikāl ederken hâlâ emîn-i mezbûr benim sülüs-ı erbâ‘ı hissemi vermede te‘allül eder suâl olunsun dedikde gıbbeˈs-suâl emîn-i mezbûr cevâbında müteveffâ-yı mezbûrun terekesinin sülüs-ı erbâ‘ına vaz‘-ı yedini ikrâr lâkin mezbûr Dervişˈin vech-i meşrûh üzere müteveffâ-yı merkūme verâseti inkâr edicek müdde‘î-i mezbûra verâsetine beyyine taleb olundukda udûl-ı Müslimînˈden olup zikrolunan Halevel karyesinden olan Mehmed b. Ebûbekir ve Süleyman b. Mustafa nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīka müteveffâ-yı mezbûrun babası mezbûr Hasanˈın müdde‘î-i merkūm Derviş li-ebeveyn karındaşı olup babaları ismi Mehmed ve cedleri ismi İskender ve anaları ismi Âişe ve maskat-ı re’sleri sâlifüˈz-zikr Halevel karyesi olmağla müteveffâ-yı mezbûrun verâseti zevcesi mezbûre Âişe ile min-cihetiˈl-usûbetiˈn-nesebiye merkūm Dervişˈe münhasıradır mezkûr Derviş içün tereke-i müteveffâ-yı mezbûrun sülüs-ı erbâ‘ı hak taleb ve ahz vardır biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘deˈt-ta‘dîl veˈt-tezkiye şehâdetleri makbûle oldukdan sonra mûcebiyle mezbûr Dervişˈin verâsetine hüküm birle mâ vaka‘a biˈt-taleb ketb olundu. Fiˈs-sâlis veˈl-işrîn min-Cumâdelâhire li-sene hamse ve semânîn ve elf. Şuhûdüˈl-hâl: Abdüllatif Çelebi b. Mehmed, Fazlullah Çelebi b. İbrahim, Ali Beşe tâbi‘-i serdâr, Hüseyin Çelebi b. Ali, Ömer Efendi b. Ali, İsa Beşe b. Halil, Ahmed Beşe b. Murad, Mustafa Beşe b. Mehmed