Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 846 Hüküm no: 637 Orijinal metin no: [144a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Reis’ten varislere intikal eden şayka hisselerinin, diğer hissedar Mehmed Odabaşı’ya vekil aracılığıyla satıldığı Mahmiye-i Galata hâricinde Bedreddin mahallesinde sâkin iken bundan akdem vefât eden Mehmed Reis b. Mustafaˈnın zevce-i metrûkesi Fatma bt. Abdullah ile sulbiye-i sagīre kızları Hadîce ve Havva ve Emineˈye ve li-ebeveyn kız karındaşı Mümine nâm hatuna münhasıra olduğu şer‘an zâhir ve müte‘ayyin oldukdan sonra sagīrân-ı mezbûrânın kıbel-i şer‘den mansûb vasîleri olup ve merkūme Fatma dahi husûs-ı âtiˈl-beyâna vekîl olup mezkûre Fatmaˈnın zâtını ma‘rifet-i şer‘iye ile ârifân olan Süleyman Çelebi b. Mustafa ve Halil Çelebi b. Abdusselam şehâdetleriyle şer‘an vekâleti sâbite olan Musa Çelebi b. Ali ve merkūme Mümine Hatun tarafından zikri câ’î husûsa vekîli olup lâkin zât-ı mezbûre-i mevsûfeyi ma‘rifet-i şer‘iye ile ârifân olan şâhidân-ı mezbûrân şehâdetleriyle şer‘an vekâleti sâbite olan Ömer Ağa b. Ahmed meclis-i şer‘-i hatîrde işbu bâ‘isüˈl-kitâb Mehmed Odabaşı b. Ahmed mahzarında her biri vesâyeten ve vekâleten ikrâr ve takrîr-i kelâm edip hâlâ mahmiye-i mezbûre hısnı ebvâbından Kireçkapısı iskelesinde merbût şayka ta‘bîr olunur yirmi zirâ‘ sefînenin rub‘ı müteveffâ-yı mezbûrun sülüs-ı erbâ‘ı merkūm Mehmed Odabaşıˈnın mülkü olup müteveffâ-yı mezbûrun rub‘ hissesi bey‘ olunmak lâzım gelmeğin biˈl-izniˈş-şer‘î hâssa münâdîlerinden el-Hâc Mustafa yediyle hisse-i mezkûresini beyneˈt-tâlibîn nidâ ve müzâyede olunup yüz on esedî guruşda şerîk-i merkūm Odabaşı üzerinde karâr ve ziyâde ile tâlib-i âhar olmadığından mâ‘adâ meblağ-ı mezbûr sâlifüˈz-zikr rub‘ hissenin hâlâ semen-i mislidir deyü sikāt-ı Müslimîn haberleriyle ledeˈş-şer‘iˈl-mutahhar mukarrer oldukdan sonra hisse-i mezbûreyi her birimiz vesâyeten ve vekâleten meblağ-ı mezbûr yüz on esedî guruşa mezbûr sâlifüˈz-zikr rub‘ hissenin bey‘-ı bâtt-ı sahîh-i şer‘î ile bey‘ ve teslîm ol dahi ba‘deˈl-iştirâ veˈt-tesellüm semeni olan meblağ-ı mezbûru her birimiz vesâyeten ve vekâleten merkūm Mehmed Odabaşı yedinden tamamen alıp kabz edip sefîne-i mezbûrenin mecmû‘ı mülk-i sarîhdir dediklerinde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈs-sâlis veˈl-işrîn min-Cumâdelâhire li-sene hamse ve semânîn ve elf. Şuhûdüˈl-hâl: el-Hâc Halil Çelebi b. Mustafa, Hüseyin Çelebi b. Mehmed, Abdi Çelebi b. Memi, Mahmud Çelebi b. el-Hâc Mustafa, el-Hâc Abdi Çelebi b. Hasan, Mehmed Çelebi b. Bayram, Abdusselam b. Halil, Mustafa Beşe b. Mehmed, Hasan Beşe b. Mustafa