Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 856 Hüküm no: 645 Orijinal metin no: [145a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin, merhum Mehmed Reis zimmetindeki zift, katran ve mismar bahasından alacağını varislerden talep ettiği İşbu bâ‘isüˈl-vesîka Mehmed Beşe b. Mahmud meclis-i şer‘de mahmiye-i Galata hâricinde Bedreddin Bey mahallesinde sâkin iken bundan akdem fevt olan Mehmed Reis b. Mustafaˈnın sulbiye-i sagīre kızları Hadîce ve Havva ve Emineˈnin kıbel-i şer‘den mansûb vasîleri olan Musa Çelebi b. Ali mahzarında üzerine da‘vâ ve takrîr-i kelâm edip müteveffâ-yı mezbûrun zimmetinde yedinde müşterâ ve makbûz vakıyyesi beynimizde ilm-i şer‘î ile ma‘lûm zift ve katran ve mismâr semenlerinden otuz esedî hakkım olup meblağ-ı mezbûrun beş esedini yedinden kabz edip bâkī kableˈl-istifâ fevt olmağla hâlâ vasî-i mezbûrdan taleb ederim suâl olunsun dedikde gıbbeˈs-suâl veˈl-inkâr ve ba‘de talebiˈl-beyyine udûl-ı ricâlden Durmuş b. İbrahim ve Mustafa b. Mehmed li-ecliˈş-şehâde meclis-i şer‘a hâzırân olup eserüˈl-istişhâd fiˈl-vâki‘ müteveffâ-yı mezbûr hayatında vech-i muharrer üzre meblağ-ı bâkī mezbûr yirmi beş esedî guruş mezbûr Mehmed Beşeˈye zimmetimde deynim vardır deyü huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra müdde‘î-i mezbûr Mehmed Beşe gıbbeˈt-tahlîfiˈş-şer‘îyyüˈl-mu‘teber mûcebiyle hüküm birle mâ vaka‘a biˈt-taleb ketb olundu. Fiˈl-hâmis veˈl-işrîn min-Cumâdelâhire li-sene hamse ve semânîn ve elf. Şuhûdüˈl-hâl: İbrahim Beşe b. Mustafa, Receb b. Abdullah, Halil Çelebi b. Abdusselam, Abdüsselam b. Halil, Mehmed Çelebi b. Bayram, Ahmed b. Osman Beşe, Hüseyin Çelebi b. Ali, Ömer Efendi b. Ali