Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 855 Hüküm no: 644 Orijinal metin no: [145a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Bey’in, merhum Ali’nin kardeşi olup kendi hissesine düşen terekeyi diğer varislerden teslim aldığı Hâlâ Medîne-i Münevvere -şerrefehullâhu te‘âlâ alâ münevvirihâ- mücâvirlerinden olan umdetüˈl-zevvârüˈl-harameynüˈş-şerîfeyn el-Hâc Abdullah Bey b. Abdülmennan meclis-i şer‘-i hatîrde mahmiye-i Galata muzâfâtından nefs-i İstinyeˈde Kürkçübaşı mahallesinde sâkin iken bundan akdem vefât eden el-Hâc Ali b. Abdullahˈın verâseti zevce-i metrûkesi Hadîce bt. Mustafa ile sulbî oğulları Mehmed ve Ahmed ve sulbiye kızı Fatmaˈya münhasıra olup kableˈl-kısme mezbûr Mehmed dahi fevt olup verâseti anası mezbûre Hadîce ile li-ebeveyn karındaşları Ahmed ve Fatmaˈya münhasıra olup kableˈl-kısme mezbûre Fatma dahi vefât edip verâseti anası mezbûre ile li-ebeveyn karındaşı mezbûr Ahmedˈe münhasıra olup kableˈl-kısme merkūm Mehmed dahi fevt olup verâseti anası mezbûre ile babası mezbûr el-Hâc Aliˈyi i‘tâk eden el-Hâc Süleymanˈın oğlu el-Hâc Mehmedˈin oğlu Süleyman nâm sagīre münhasıra olmak üzere ol dahi şer‘an zâhir ve tashih-i mes’eleleri bi-hükmiˈl-münâsahatiˈş-şer‘iye üç bin iki yüz kırk sehimden i‘tibâr olunup sihâm-ı mezbûrenin altı yüz yetmiş iki sehmi mezbûre Hadiceˈye ve bin beş yüz altmış sekiz sehmi sagīr-i mezbûr Süleymanˈa isâbet etmek üzere ol dahi bâhir ve mütehakkık oldukdan sonra sagīr-i mezbûrun tesviye-i emrine kıbel-i şer‘den mansûbe vasîsi ve vâlidesi olan işbu bâ‘isetüˈl-kitâb Sâliha bt. İbrahim nâm hatun mahzarında ikrâr ve takrîr-i kelâm edip müteveffâ-yı mezbûr el-Hâc Ali Bey li-ebeveyn karındaşı olup benim vücûdum ile sagīre-i merkūm Süleyman (...?) mahrûm iken müteveffâ-yı mezbûr el-Hâc Aliˈnin oğlu mezbûrân ile kızı sagīre-i mezbûrenin hîn-i vefâtlarında (....?) mevcûd olmamak ile tashîh-i mezkûrdan benim bin yüz altmış sekiz sehim beynehûm hisseme isâbet eden ber-mûceb-i defter-i kassâm-ı askerî on üç bin dokuz yüz elli altı akçe hakkımı sagīr-i mezbûrun vasîsi merkūme Sâliha kabz etmişdir elhâletü hâzihî ben minvâl-i muharrer üzere müteveffâ-yı evvel mezbûr el-Hâc Aliˈnin li-ebeveyn karındaşı olduğumu huzûr-ı hâkimüˈş-şer‘de vasî-i mezbûre Sâliha Hatun muvâcehesinde İbrahim Ağa b. Sefer ve Süleyman Bey b. Abdullah nâm kimesneler şehâdetleri ba‘deˈl-isbât verâsetime hükm-ı şer‘î lâhık oldukdan sonra hâlâ ben dahi meblağ-ı mezbûr on üç [bin] dokuz yüz elli altı akçenin altı bin akçe olmak üzere vasî-i mezbûre Sâliha yedinden elli esedî guruş ve bir rub‘ ve altı akçe mutâlebesinde sagīr-i merkūm Süleymanˈın zimmetini ibrâ’-i âm ile ibrâ’ ve ıskāt edip husûs-ı mirasa müte‘allika vechen mineˈl-vücûh sagīr-i merkūm Süleymanˈdan ve vasîsi mezbûre Sâliha yedinde hak ve alâkam kalmadı dedikde gıbbeˈt-tasdîk mâ-vaka‘a biˈt-taleb ketb olundu. Fiˈs-sâlis veˈl-işrîn min-Cumâdelâhire li-sene hamse ve semânîn ve elf. Şuhûdüˈl-hâl: Osman Çelebi b. el-Hâc Yusuf, Yusuf Ağa b. Cafer, Ömer Efendi b. Ali, Hasan Çelebi b. İshak, Mustafa Ağa b. Hızır, Hüseyin Çelebi b. Ali, İsa Bey b. Halil