Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 857 Hüküm no: 647 Orijinal metin no: [145b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Martin v. Tozor’un, merhume Fatma bt. Halil Ağa’nın zimmetindeki alacağını vasî Ebubekir’den talep ettiği Mahmiye-i Galataˈya tâbi‘ kasaba-i Tophâneˈde Cihangir mahallesinde sâkine iken bundan akdem vefât eden Fatma bt. Halil Ağaˈnın verâseti kebîre kızı Hadîce ile sagīre kızı Âişeˈye münhasıra olduğu şer‘an zâhir ve müte‘ayyin oldukdan sonra işbu bâ‘isüˈs-sifr Martin v. Tozor nâm zimmî meclis-i şer‘de sagīre-i mezbûrenin tesviye-i emrine kıbel-i şer‘den mansûb vasîleri olan Ebûbekir b. Abdurrahman mahzarında üzerine da‘vâ ve takrîr-i kelâm edip müteveffât-ı mezbûrenin zimmetinde cihet-i karz-ı şer‘îden yirmi esedî guruş hakkım olup kableˈl-istifâ fevt olup hâl-i hayatında bana meblağ-ı mezbûr deyni olduğunu alâ-ruûsiˈl-işhâd ikrâr ve işhâd dahi etmişdir hâlâ tereke-i müteveffât-ı mezbûre vâzi‘uˈl-yed olan [olan] vasî-i mezbûrdan taleb ederim suâl olunup alıverilmesi matlûbumdur dedikde gıbbeˈs-suâl veˈl-inkâr oldu talebüˈl-beyyine udûl-ı Müslimînˈden olup es-Seyyid Osman b. Halil ve Eyüb Çelebi b. Enbiyâ li-ecliˈş-şehâde meclis-i şer‘a hâzırân olup fiˈl-vâki‘ müteveffât-ı mezbûre hâl-i hayatında ve kemâl-i akl-ı sıhhatinde bizim huzûrumuzda müdde‘î-i mezbûr Martinˈe cihet-i karz-ı şer‘den yirmi esedî guruş deyni olduğunu ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâ’itiˈl-kabûl şehâdetleri makbûle oldukdan sonra müdde‘î-i mezbûr ba‘deˈt-tahlîfiˈş-şer‘î mâ vaka‘a biˈt-taleb ketb olundu. Fî-selh-i Cumâdelâhire li-sene hamse ve semânîn ve elf. Şuhûdüˈl-hâl: Ömer Çelebi b. el-Hâc Mustafa, Abdullah Çelebi b. el-Hâc İsmail, Mehmed Çelebi b. ( ), Ahmed Beşe b. Osman, Veli b. Hüseyin ve gayruhum