Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 858 Hüküm no: 648 Orijinal metin no: [145b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Musa Çelebi b. Ali’nin, merhum Mehmed Reis zimmetindeki zift ve mismar bahasından alacağını varislerin vekili Ömer Ağa’dan talep ettiği İşbu bâ‘isüˈl-vesîka Musa Çelebi b. Ali meclis-i şer‘de mahmiye-i Galata hâricinde Bedreddin Bey mahallesinde sâkin iken bundan akdem vefât eden Mehmed Reis b. Mustafaˈnın verâseti zevce-i metrûkesi Fatma bt. Abdullah sulbiye-i sagīre kızları Hadîce ve Havva ve Ümmü ve li-ebeveyn kız karındaşı Mümine nâm hatuna münhasıra olduğu şer‘an zâhir ve müte‘ayyin oldukdan sonra mezbûre Mümineˈnin vekîl-i müsecceli olan Ömer Ağa b. Ali mahzarında üzerine da‘vâ ve takrîr-i kelâm edip müteveffâ-yı mezbûr zimmetinde yedimden müşterâ ve makbûz vakıyyesi beynimizde ilm-i şer‘le ma‘lûm zift ve mismâr semenlerinden bin yüz yirmi akçe hakkım olup meblağ-ı merkūm kableˈl-ahz fevt olup hâl-i hayatında meblağ-ı mezbûretâna deyni olduğunu huzûr-ı Müslimînˈde ikrâr ve işhâd dahi etmekle hâlâ taleb ederim suâl olunsun dedikde gıbbeˈs-suâl veˈl-inkâr ve isre-talebiˈl-beyyine udûl-ı Müslimînˈden Himmet b. Mehmed ve Halil b. Abdusselam nâm kimesneler li-ecliˈş-şehâde meclis-i şer‘â hâzırân olup eserüˈl-istişhâd fiˈl-vâki‘ müteveffâ-yı mezbûr hayatında müdde‘î-i mezbûre meblağ-ı mezkûr zimmetimde deynimdir deyü huzûrumda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ’-i şehâdet-i şer‘iye eylediklerinde ba‘de ri‘âyet-i şerâ’itiˈl-kabûl şehâdetleri makbûle oldukdan sonra müdde‘î-i mezbûre ba‘deˈt-tahlîf mûcebiyle ba‘deˈl-hükm mâ vaka‘a biˈt-taleb ketb olundu. Fiˈl-hâmis veˈl-işrîn li-sene hamse ve semânîn ve elf. Şuhûdüˈl-hâl: İbrahim Çelebi b. Ali, Süleyman Çelebi b. Mustafa, Hüseyin Çelebi b. Ali, Yusuf Beşe b. Abdullah