Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 869 Hüküm no: 657 Orijinal metin no: [147b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha ve Ümmühani’nin, merhum amcaları Hasan Çorbacı’dan kendilerine intikal eden tereke hisselerini Osman Ağa’dan alıp Sultan Ahmed Vakfı’na bağışladıkları Mahrûse-i Galata a‘mâlinden kasaba-i Tophâneˈde Karabaş mahallesi sükkânından olup bundan akdem sefer-i hümâyûnda vefât eden Hasan Çorbacıˈnın verâseti li-ebeveyn ammi kızları Sâliha ve Ümmühani nâm hatunlara münhasıra olduğu şer‘an zâhir ve mütehakkık oldukdan sonra mezbûretân Sâliha ve Ümmühani meclis-i şer‘-i hatîrde mahrûse-i mezbûrede biˈl-fi‘il voyvoda olan fahrüˈl-emâsil Osman Ağa tarafından ikrâr-ı âtiˈl-beyânı tasdîka vekîl olup nehc-i şer‘î üzere vekâleti sâbite olan Mehmed Bey b. Ali mahzarında her biri ikrâr ve takrîr-i kelâm edip mûrisimiz müteveffâ-yı mezbûrun terekesinden müvekkil-i mûmâ-ileyhin ahz u kabz eylediği altı bin akçeden biˈl-irsiˈş-şer‘î her birimizin hissesine isâbet ve intikāl eden üç bin akçe hissemizi müvekkil-i mûmâ-ileyh yedinden ahz u kabz edip cânib-i Sultân Ahmed Vakfıˈna teberru‘ eyledik min-nakd meblağ-ı merkūmdan müvekkil-i mûmâ-ileyh yedinde bir akçe ve bir habbe kalmadı deyü mukırr-ı mezbûre Sâliha ve Ümmühaniˈnin vech-i meşrûh üzere cârî ve sâdır olan ikrârlarını vekîl-i mezkûr Mehmed Bey dahi biˈl-vekâle vicâhen tasdîk şifâhen tahkīk edicek mâ vaka‘a biˈt-taleb ketb olundu. Fiˈl-yevmiˈl-âşir min-şehri Recebiˈl-ferd li-sene [10]85 Şuhûdüˈl-hâl: Fahrüˈl-eimme Mustafa el-imâm b. ( ), Abdullah b. Nasuh, Ali b. Mehmed, Hacı Mustafa b. Hasan, Salih Çelebi b. Yusuf, Hüseyin b. Ali, Ahmed b. Abdullah ve gayruhum.