Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 869 Hüküm no: 658 Orijinal metin no: [147b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi’nin, merhum Mehmed Reis zimmetindeki gulam bahasından alacağını varislerin vekili Ömer Ağa’dan talep ettiği İşbu bâ‘isüˈl-kitâb Mustafa Çelebi b. Ramazan meclis-i şer‘-i hatîrde mahmiye-i Galata hâricinde Bedreddin Bey mahallesinde sâkin iken bundan akdem vefât eden Mehmed Reis b. Mustafaˈnın verâseti zevce-i menkûhası Fatma bt. Abdullah ile sulbiye sagīre kızları Havva ve Hadîce ve Ümmüˈye ve li-ebeveyn kız karındaşı ve min-cihetiˈl-usûbe vârisi olan Mümine nâm hatuna münhasıra olduğu şer‘an zâhir ve müte‘ayyin oldukdan sonra sagīrât-ı mezkûrâtın tesviye-i emirlerine kıbel-i şer‘den mansûb vasîleri ve merkūme Fatmaˈnın dahi vekîl-i müsecceli olan Musa Çelebi b. Ali ile mezbûre Mümineˈnin dahi vekîl-i müsecceli olan Ömer Ağa b. Ahmed mahzarlarında üzerlerine da‘vâ ve takrîr-i kelâm edip müteveffâ-yı mezbûr zimmetinde yedimden müşterâ ve makbûz her biri yetmiş yedişer guruşa olmak üzere dört kâfir gulâm bahâlarından üç yüz sekiz guruş hakkım olup meblağ-ı mezbûrun doksan bir guruşunu hayatında meblağ-ı bâkī mezbûr zimmetinde bana deyni olduğunu huzûr-ı Müslimînˈde ikrâr ve işhâd dahi etmekle hâlâ taleb ederim suâl olunsun dedikde gıbbeˈs-suâl [148a] veˈl-inkâr ve ba‘de talebiˈl-beyyine udûl-ı Müslimînˈden Hasan Beşe b. Muslı ve Mustafa b. İbrahim nâm kimesneler li-ecliˈş-şehâde meclis-i şer‘a hâzırân olup işhâd olundukda fiˈl-hakīka müteveffâ-yı mezbûr hayatında meblağ-ı bâkī mezbûr zimmetimde müdde‘î-i mezbûre deynimdir deyü huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâ’itiˈl-kabûl şehâdetleri makbûle oldukdan sonra müdde‘iyye-i mezbûre ba‘deˈt-tahlîf mûcebiyle ba‘deˈl-hükm mâ vaka‘a biˈt-taleb ketb olundu. Fiˈl-hâmis min-Recebiˈl-ferd li-sene hamse ve semânîn ve elf. Şuhûdüˈl-hâl: Mehmed Beşe b. Ahmed, Mehmed Beşe b. Hasan, Mehmed Beşe b. Hüseyin, İsa Beşe b. Halil, Hüseyin Çelebi b. Ali