Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 54 Hüküm no: 3 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Bey b. Hasan çiftliğini zevcesi Rukiye Hatun bt. el-Hâc Abdullah Ağa’ya sattığı Vilâyet-i Rumeli’nde vâki‘ Hezargrad kasabası mahallâtından Behram Bey mahallesi ahâlîsinden İbrahim Bey b. Hasan mahfel-i şer‘-i hatîr-i lâzimü’t-tevkīrde zevcesi Rukiye Hâtun bt. el-Hâc Abdullah Ağa b. Ramazan tarafından bey‘-i âti’l-beyânı tasdîka sâbitü’l-vekâle vekîli olan işbu râfi‘u’l-vesîka Abdullah Efendi b. İbrahim Efendi mahzarında ikrâr ve takrîr-i kelâm edip akd-i âtî sudûruna değin yedimde mülküm olup mahalle-i merkūmede vâki‘ Mütevellizâde Çiftliği demeğle ma‘rûf bir tarafı Şa‘ban Ağa Çiftliği ve bir tarafı Ahmed Bey Câmi‘-i şerîfi ve iki tarafı tarîk-i âmma müntehî dâhilen fevkānî üç bâb oda ve dehlîz ve tahtânî taş mahzen ve üstü örtülü sâye-bân ve bir hizmetkâr odası ve kenîf ve hâricen bir bâb oda ve yedi bâb ırgad odaları ve bir ahır ve bi’r-i mâ ve kenîf ve bir mikdâr havluyu müştemil mülk çiftliğimi içinde mevcûd iki re’s câmûs ve sekiz re’s öküz ve üç re’s câmûs ineği ve üç re’s kara sığır ineği ile ma‘an bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcem müvekkile-i merkūme Rukiye Hâtun’a bi-safkatin vâhidetin iki yüz elli guruşa bey‘ u temlîk edip ve Toprak nâm karyede vâki‘ yüz kile tohum isti‘âb eder ma‘lûmü’l-hudûd ve’l-kıt‘a tarlalarımı ve Karaağaç tarlası demeğle ma‘rûf bir kıt‘a tarlamı bâ-ma‘rifet-i sâhib-i arz zevcem müvekkile-i merkūme Rukiye Hâtun’a meccânen ferâğ ve tefvîz eylediğimde ol dahi ber-vech-i muharrer iştirâ ve temellük ve tefevvüz ve kabûl eyledikden sonra semeni olan meblağ-ı mezbûr iki yüz elli guruşa müte‘allika da‘vâdan zevcem müşteriye-i merkūme Rukiye Hâtun’un zimmetini ibrâ-yı âmm ile ibrâ ve ıskāt eyleyip ve her birini mahallerinde zabt ve tasarrufa taslît eyledim fîmâ ba‘d zikirleri sebk eden çiftlik ve derûnunda mevcûde olan hayvânât ve eşyâ-i sâire ve tarlalar cemî‘ müştemilâtlarıyla zevcem müvekkile-i merkūme Rukiye Hâtun’un mülk-i müşterâsı ve hakk-ı müfevvezi olmuşdur keyfemâ teşâ ve tahtâr mutasarrıfa olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis aşer min-Cumâdelâhire li-sene seb‘a ve selâsîn ve mi’e ve elf. Şuhûdü’l-hâl: Kahveci Mahmud, Tarakçı Osman, Katifeci İbrahim Çelebi, Hüseyin Bey tâbi‘-i Ömer Ağa, Canbaz Ömer Ağa, Canbaz Ahmed Çelebi, Süleyman Bey tâbi‘-i Ağa, Mehmed Çelebi b. Veli, es-Seyyid Mehmed Çelebi b. Abdullah Efendi, Hezargradlı es-Seyyid Hüseyin Efendi, el-Hâc Mustafa Efendi b. el-Hâc Ahmed, Hammâmi Hasan Çelebi, Mustafa Çelebi.