Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 780 Hüküm no: 1018 Orijinal metin no: [120b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kadı Musa Efendi’nin Bostancı Veli Bey b. Murad’a olan borç davasında sulh olup Musa Efendi’nin bir miktar daha borcu kaldığı Hâssa bostancılardan fahrü’l-akrân ve’l-eşbâh Veli Bey b. Murad nâm kimesne meclis-i şer‘de sâbıkan Aksaray kadısı olup hâlâ muvakkaten Isparta kadısı olan Musa Efendi b. Mehmed Efendi mahzarında ikrâr ve takrîr-i kelâm edip mezbûr Musa Efendi zimmetinde karz-ı şer‘îden [121a] dört yüz on beş ve yedimden müşterâ ve makbûz beynimizde ma‘lûm mushaf-ı şerîf hediyesinden yüz esedî guruş cem‘an beş yüz on beş esedî guruş hakkım olmağla bundan akdem mezbûr Musa Efendi’den iki yüz elli guruş olmak üzre otuz beş bin hurda akçe ve elli guruşu için dahi beynimizde ma‘lûm bir at alıp bâkī iki yüz on beş esedî guruş hakkımı mezbûr Musa Efendi’den taleb ettiğimde mezbûr Musa Efendi dahi zimmetinde olan beş yüz on beş esedî guruş hakkından ahzını i‘tirâf ettiği otuz beş bin akçe [ve] bir at üzerlerine mukaddemâ benim ile sulh olup bâkīden zimmetimi ibrâ etmişidik demekle beynimizde nizâ‘-ı küllî vukū‘undan sonra muslihûn tavassut edip mezbûr Musa Efendi ile beynimizde yüz esedî guruş üzerine inşâ-i akd-i sulh eylediklerinde bedel-i sulh-i mezbûru kabûl ve bedel-i sulh-i mezbûrdan mâ‘adâ husûs-ı mezbûra ve târih-i kitâba gelince beynimizde vâki‘ olan ahz ve i‘tâya müte‘allika âmme-i hukūk-ı ma‘lûme ve mechûle da‘vâsından ben mezbûr Musa Efendi’nin ve mezbûr Musa Efendi dahi benim zimmetimi ibrâ-i âmm-ı kātı‘ü’n-nizâ‘ ile ibrâ ve iskāt eyledi dedikde gıbbe mezbûr Musa Efendi meclis-i mezbûrda merkūm Veli Bey mahzarında ikrâr ve takrîr-i kelâm edip mezbûr Veli Bey’e bedel-i sulh-i mezbûr yüz esedî guruş ve sulh-i mezbûrdan sonra yedinden iktirâz ve kabz eylediğim otuz esedî guruş ve iştirâ ve kabz eylediğim beynimizde ma‘lûm kılıç semeni olan yetmiş esedî guruş cem‘an mezbûr Veli Bey’e elân zimmetimde vâcibü’l-edâ ve lâzımü’l-kazâ iki yüz esedî guruş deynim vardır dedikde, gıbbe’t-tasdîk mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Hasan Çavuş b. Abdullah, es-Seyyid Hasan Efendi b. el-Hâc Abdurrahman, Mehmed Efendi b. İlyas, Veli Çavuş b. Hasan, es-Seyyid Muharrem b. İsmail, es-Seyyid Ali b. İsmail.