Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 780 Hüküm no: 1017 Orijinal metin no: [120b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. İbrahim’in, boşandığı kocası Musli’den olan oğlu Ali’yi kendi malıyla büyütmeyi taahhüt ettiği Mahmiye-i İstanbul’da Balaban Ağa mahallesi sâkinelerinden Âişe bt. İbrahim ile vâlidesi Fâtıma bt. Receb nâm hâtunlar meclis-i şer‘-i şerîf-i lâzımü’t-teşrîfde mezbûre Âişe’nin zevc-i sâbıkı işbu bâ‘isü’l-kitâb Musli b. Emirşah nâm kimesne mahzarında her biri ikrâr ve takrîr-i kelâm edip mezbûr Musli’nın sulbî sagīr oğlu Ali’yi bi hakki’l-hidâne nafaka ile terbiye ve imsâk üzre iken her birimiz nefsimizi sagīr-i mezbûra ecnebî birer kimesneye tezvîc edip bizden hakk-ı hidâne sâkıt oldukdan sonra mezbûr Musli rızâsıyla sagīr-i mezbûru bize teslîm edip biz dahi ba‘de’l-yevm sagīr-i mezbûru kendi malımızdan teberru‘an infâk ve iksâ etmeğe ta‘ahhüd eyledik dediklerinde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, Hasan Çelebi b. Ahmed, Hüseyin b. Hasan, el-Hâc Mustafa b. Ahmed, Veli b. Mahmud, Mehmed b. Mustafa.