Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 72 Hüküm no: 28 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. el-Hâc Hüseyin ile Havva bt. el-Hâc Hüseyin’in müşterek menzillerini Mehmed Çelebi’ye sattıkları El-emru hasbemâ yahvîhi nemakahu’l-fakīr ileyhi sübhânehû el-Hâc Mustafa el-Kādî bi-medîne-i Galata -gufira lehû-. Mahrûse-i Galata hâricinde Müeyyedzâde mahallesinde vâki‘ bir tarafdan imâma meşrûta vakıf menzil ve bir tarafdan Mehmed Efendi menzili ve bir tarafdan ba‘zen Haseki Vakfı’ndan mezbûr Mehmed Efendi tasarrufunda olan vakıf menzil ve ba‘zen vakf-ı mezbûrdan Mehmed Çelebi tasarrufunda olan vakıf menzil ve bir tarafdan tarîk-i âm ile mahdûd fevkānî iki bâb oda ve iki sofa ve dehlîz ve tahtânî iki bâb oda ve bir sofa ve tahtında mahtab ve kenîf ve bir mikdâr havluyu müştemil mülk menzilin nısf-ı şâyi‘i Fâtıma bt. el-Hâc Hüseyin ve nısf-ı şâyi‘-i âharı kız karındaşı Havva bt. el-Hâc Hüseyin nâm hâtunların ale’l-iştirâki’s-seviy irsen mülkleri olduğu lede’ş-şer‘i’l-enver zâhir ve mukarrer oldukdan sonra mezbûre Fâtıma Hâtun’un kebîr oğlu ve tarafından bey‘-i âti’l-beyânı ikrâra vekîli olduğu zât-ı mezbûreyi ma‘rifet-i şer‘iyye ile ârifân Mustafa Ağa b. Abdülkādir ve Hüseyin Ağa b. el-Hâc Mehmed şehâdetleriyle şer‘an sâbit olan İbrahim Ağa b. el-Hâc Bekir ve mezbûre Havva Hâtun tarafından kezâlik bey‘-i câi’z-zikri ikrâra vekîli olduğu mezbûrenin zâtını ma‘rifet-i şer‘iyye ile ârifân Abdüllatif Çelebi b. Abdurrahman ve Bekir Beşe b. Receb şehâdetleriyle şer‘an sâbit olan el-Hâc Osman b. el-Hâc Ahmed mahfil-i şer‘de mezbûre Havva Hâtun’un kebîr oğlu işbu râfi‘u’l-vesîka Mehmed Çelebi b. Ali mahzarlarında bi’l-vekâle ikrâr ve takrîr-i kelâm edip müvekkilelerimiz mezbûre Fâtıma Hâtun ve Havva Hâtun bâlâda zikr u beyân olunduğu üzere ale’l-iştirâki’s-seviy mülkleri olan menzil-i mahdûd-ı merkūm bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile her biri yüzer guruşdan cem‘an iki yüz guruşa mezbûr Mehmed Çelebi’ye bey‘ u teslîm eylediklerinde ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûru her biri bi-kadri’l-hısas müşterî-i mezbûr Mehmed Çelebi yedinden tamâmen alıp kabz eylediler ba‘de’l-yevm menzil-i mahdûd-ı merkūm bi-cümletin mâ yeştemilehû ve yahvîhi müşterî-i mezbûr Mehmed Çelebi’nin mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis aşer min-Cemâziyelâhir li-sene 1137. Şuhûdü’l-hâl: Hüseyin Efendi b. Hasan, Mehmed Efendi el-imâm, Abdurrahman Efendi b. Mehmed, Molla Abdurrahim el-müezzin, el-Hâc Mehmed Ağa, Ya‘kub Ağa, el-Hâc Osman b. el-Hâc Mehmed, Salih Ağa b. Nasuh, İbrahim Ağa b. Süleyman, Abdüllatif Çelebi b. Abdurrahim, Mehmed Ağa b. Ömer.