Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 71 Hüküm no: 27 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vârislerin Hüseyin b. Mustafa’yı öldüren Hasan Beşe ile sulh oldukları Mahrûse-i Galata muzâfâtından kasaba-i Tophâne’de İlyas Çelebi mahallesinde sâkin iken bundan akdem cerîhan vefât eden Hüseyin b. Mustafa nâm kimesnenin verâseti zevce-i metrûkesi Fâtıma bt. Ahmed ve anası Ünzile bt. Hüseyin nâm hâtunlara münhasıra olduğu lede’ş-şer‘i’l-enver zâhir ve mukarrer oldukdan sonra zâtları el-Hâc Mehmed b. Abdullah ve Ali Beşe b. Ahmed nâm kimesneler ta‘rîfleriyle mu‘arrefe olan mezbûretân Fâtıma ve Ünzile meclis-i şer‘de Dergâh-ı âlî topcularından işbu râfi‘u’l-kitâb Hasan Beşe b. Mustafa nâm kimesne mahzarında her biri bi’l-verâse ikrâr ve takrîr-i kelâm edip mezbûr Hasan Beşe târih-i kitâbdan yirmi beş gün mukaddem mûrisimiz müteveffâ-yı mezbûr Hüseyin’i medîne-i Üsküdar’a tâbi‘ Kadıköy iskelesinde kendi kayığında bıçak ile sağ omzu başından amden bi-gayrı hakkın darb ve cerh edip ve cerh-i mezbûrun te’sîrinden nâşî on gün mürûrunda vefât etmeğle mûceb-i şer‘îsi mezbûr Hasan Beşe’den taleb ve da‘vâ eylediğimizde ol dahi husûs-ı mezbûru bi’l-külliye inkâr edip ve biz müdde‘âmızı beyâna kādir olmayıp mezbûr Hasan Beşe’yi tahlîf sadedinde iken beynimize muslihûn tavassut edip da‘vâ-yı mezkûremizden mezbûr Hasan Beşe ile bizi an-inkâr fedâen li’l-yemîn otuz guruş üzerine inşâ-i akd-i sulh eylediklerinde biz dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûr otuz guruşu mezbûr Hasan Beşe yedinden tamâmen ahz u kabz eylediğimizden sonra mûrisimiz müteveffâ-yı mezbûrun dem u diyetine müte‘allika âmme-i de‘âvî ve mutâlebât ve eymân ve muhâsamâtdan mezbûr Hasan Beşe’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimizde ol dahi bedel-i sulh-i mezbûr otuz guruşa müte‘allika da‘vâdan bizim zimmetimizi ibrâ ve ıskāt eyledi dediklerinde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis ve’l-ışrîn min-Cemâziyelâhir li-sene 1137. Şuhûdü’l-hâl: Salih Odabaşı b. Mehmed, Abdurrahman Odabaşı b. Ali, Hüseyin Beşe b. Halil, Yusuf b. Mehmed, Mustafa Beşe b. Ali, Ahmed Beşe b. Mehmed, Halil b. Mustafa, Mustafa Beşe b. Osman, Hüseyin Beşe b. Hasan, Mustafa Beşe b. Receb.