Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 74 Hüküm no: 30 Orijinal metin no: [4a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Samaon v. Delot’un menzilini Yorgi v. Danil’e sattığı Mahmiye-i İstanbul’da Unkapanı’nda sâkin iksîrci tâifesinden Samaon v. Delon nâm Ermeni mahfil-i şer‘de işbu hâmilü’r-rakīm Yorgi v. Danil nâm zimmî muvâcehesinde ikrâr ve takrîr-i kelâm edip akd-i âtî sudûruna değin yedimde mülküm olup mahrûse-i Galata hâricinde Kamer Hâtun mahallesinde vâki‘ bir tarafdan Saatci Koyunoğlu veresesi mülkleri ve bir tarafdan Vasilaki mülkü ve tarafeyninden tarîk-i âm ile mahdûd fevkānî iki bâb oda ve bir sofa ve tahtında bi’r-i mâ ve kenîf ve eşcâr-ı müsmire ve gayr-i müsmireli bahçeyi müştemil mülk menzilimi cemî‘ tevâbi‘ ve levâhıkı ve kâffe-i menâfi‘ ve’l-merâfıkıyla tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Yorgi’ye üç yüz elli guruş ile mechûlü’l-aded bir kabza fülûsa bey‘ u temlîk ve teslîm eylediğimde ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr ile mechûlü’l-aded bir kabza fülûsu müşterî-i merkūm yedinden tamâmen alıp kabz eylediğimden sonra zikr olunan mechûlü’l-aded bir kabza fülûsu işbu meclis-i şer‘de saçıp izâ‘at ve itlâf eyledim fîmâ ba‘d menzil-i mahdûd-ı mezbûr bi-cümletin mâ yeştemilehû ve yahvîhi müşterî-i merkūm Yorgi’nin mülk-i müşterâsı olup keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis ve’l-ışrîn min-Cemâziyelâhir li-sene 1137. Şuhûdü’l-hâl: Arusi Mustafa Efendi b. Hasan, Ahmed Efendi b. Süleyman, Süleyman Efendi b. Osman, Mustafa Efendi b. Mehmed, el-Hâc Mehmed Efendi b. Mustafa, Bağdasar v. Sefer, Kutlu Bey v. Sefer, Ruşen v. Avavak.