Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 74 Hüküm no: 31 Orijinal metin no: [4a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Veliyüddin’in mülk menzilini Emetullâh Hatun bt. Bayram’a sattığı Mahrûse-i Galata a‘mâlinden kasaba-i Kasımpaşa’da el-Hâc Hüsrev mahallesinde sâkine Emine bt. Veliyüddin b. Abdülkerîm nâm hâtun tarafından bey‘-i âti’l-beyânı ikrâra vekîli olduğu zât-ı mezbûreyi ma‘rifet-i şer‘iyye ile ârifân es-Seyyid Mustafa b. Musa ve el-Hâc Mehmed b. Hüseyin şehâdetleriyle şer‘an sâbit olan Kayyumzâde Molla Mustafa b. Ali mahfil-i şer‘de işbu râfi‘atü’l-vesîka Emetullâh Hâtun bt. Bayram mahzarında bi’l-vekâle ikrâr ve takrîr-i kelâm edip akd-i âtî sudûruna değin müvekkile-i mezbûre Emine Hâtun silk-i mülkümde münselik olup mahalle-i merkūmede vâki‘ bir tarafdan Bakkal Ali Çelebi mülkü ve bir tarafdan berber kızı Saliha Hâtun ve Ali Çelebi veresesi mülkleri ve bir tarafdan benim âhar mülküm ve bir tarafdan tarîk-i hâss ile mahdûd tahtânî iki bâb oda ve dehlîz ve kenîf ve bi’r-i mâ ve eşcâr-ı müsmire ve gayr-i müsmireli bahçeyi müştemil mülk menzilini bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūme Emetullâh Hâtun’a seksen guruşa bey‘ u teslîm eylediğinde ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı merkûmu müşteriye-i mezbûre Emetullâh Hâtun yedinden tamâmen alıp kabz eyledi fîmâ ba‘d menzil-i mahdûd-ı merkūm bi-cümletin mâ yeştemilehû ve yahvîhi müşteriye-i merkūmenin mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis ve’l-ışrîn min-Cemâziyelâhir li-sene 1137. Şuhûdü’l-hâl: İbrahim Çelebi b. Ahmed, Bakkal Ahmed Çelebi b. Mehmed, es-Seyyid Yahya Efendi el-imâm, Molla Hasan b. Hüseyin, es-Seyyid Mustafa Çelebi b. Musa, Okcu dâmâdı el-Hâc Mehmed, İsmail Çelebi b. ( ), Halil b. Mustafa.