Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 85 Hüküm no: 45 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu Mahlaki v. Danil’in menzilini Laskari v. Dimitri’ye sattığı Mahrûse-i Galata’da Sultan Bayezid mahallesinde sâkine Kuyumcu Mihalaki v. Danil nâm zimmî mahfel-i şer‘-i hatîr-i lâzimü’t-tevkīrde işbu hâmilü’r-rakīm Laskari v. Dimitri nâm zimmî muvâcehesinde ikrâr ve takrîr-i kelâm edip akd-i âtî sudûruna değin mahalle-i mezbûrede vâki‘ bir tarafdan Dülger Hortara menzili ve bir tarafdan Panaya Kilisesi ve tarafeynden tarîk-i âm ile mahdûd ulyâda üç bâb oda ve bir sofa ve dehlîz ve üzerinde bir tahta-pûş vüstâda iki bâb oda ve bir matbah ve dehlîz süflâda iki bâb oda ve bir matbah ocağı ve tahtadan bir mahzen ve bi’r-i mâ ve kenîf ve bir mikdâr havlu ve iki sokak kapısını müştemil menzilin dört hissede iki hissesi Kürkcü Danil nâm zimmînin ve bir hissesi merkūm Laskari’nin ve bir hissesi benim iştirâken mülkümüz olmağın hâlâ ben ber-vech-i muharrer menzil-i mahdûd-ı merkūmda olan rub‘ hisse-i merkūmemi cemî‘ tevâbi‘ ve levâhık ve kâffe-i menâfi‘ ve merâfıkıyla tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Laskari’ye altı yüz guruş ile mechûlü’l-aded bir kabza fülûsa bey‘ u teslîm eylediğimde ve ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr altı yüz guruş ile bir kabza fülûsu müşterî-i merkūm Laskari yedinden tamâmen alıp kabz eyleyip ve zikr olunan bir kabza mechûlü’l-aded bir kabza fülûsu işbu meclisde saçıp izâ‘at ve itlâf eyledim fîmâ ba‘d menzil-i mahdûd-ı mezbûrda olan rub‘ hisse-i merkūmem bi-cümletin mâ yeştemilühâ müşterî-i merkūm Laskari’nin mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis ve’l-ışrîn min-Cemâziyelâhir li-sene 1137. Şuhûdü’l-hâl: Bezzâ[zi]stanî Ahmed Çelebi b. Abdullah, Münadi Mehmed Çelebi b. Mehmed, Münadi Ahmed Çelebi b. Mehmed, Düğmeci Ahmed b. Mehmed, el-Hâc Ahmed b. Süleyman, Halil b. Mustafa, Esfaki v. Yakumi, Hallac Yorgi v. Londari, Kiryako v. Yorgi, Efendoli v. Yani, Mihal v. Anaştaş, Yorgi v. Tarandafil, Dimitri v. Praşkova.