Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 84 Hüküm no: 44 Orijinal metin no: [5b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zumnu v. Varsami’nin menzilini Yorgaki v. Romano’ya sattığı Mahrûse-i Galata a‘mâlinden Mirali cezîresinde Büyük karyede sâkin Zumnu v. Varsami nâm zimmî meclis-i şer‘de işbu hâmilü’r-rakīm Yorgaki v. Romano nâm zimmî muvâcehesinde ikrâr ve takrîr-i kelâm edip akd-i âti’z-zikr sudûruna değin silk-i mülkümde münselik olup karye-i mezbûrede vâki‘ bir tarafdan Papa Liyoryo menzili ve bir tarafdan Yeraki menzili ve bir tarafdan leb-i deryâ ve bir tarafdan tarîk-i âm ile mahdûd fevkānî bir bâb oda ve bir sofa ve tahtında bir ahur ve bir mikdâr havluyu müştemil mülk menzilimi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile mersûm Yorgaki’ye doksan beş guruşa bey‘ u temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr doksan beş guruşu mersûm Yorgaki yedinden tamâmen ahz u kabz eyledim ba‘de’l-yevm menzil-i mahdûd-ı mezkûr bi-cemî‘i mâ yeştemilehû ve yahvîhi mersûm Yorgaki’nin mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîk mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin ve’l-ışrîn min-Cemâziyelâhir sene 1137. Şuhûdü’l-hâl: Yamandi v. Kiryazi, Yamandi v. Topzovili, Barakop v. Belaş, Yamandi v. İstoranos, Maskona v. Yeraki, Rali v. Yorgi, Yuvan v. Kiryaki.