Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 86 Hüküm no: 47 Orijinal metin no: [6a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Ohri / Istarova kazasından Kiko v. Köko’nun dava ettiği menzil ve eşyaların Perendo, Draçko, Tanaş ve Kiko’nun eskiden beri müşterek menzilleri olduğu
Fi’l-asl vilâyet-i Rumeli’nde vâki‘ İstarova kazâsı muzâfâtından Mokri nâhiyesine tâbi‘ Plişişte nâm karye sâkinlerinden olup hâlâ mahrûse-i Galata’da paçacı olan Kiko v. Köko v. Lazari nâm zimmî meclis-i şer‘de merkūm Lazari’nin li-ebeveyn ammisi oğullarının kebîr oğulları diğer Kiko ve Perendo veledey Niko ve Draçko ve Tanaş veledey Kolo v. Peşo nâm zimmîler muvâcehelerinde ikrâr ve takrîr-i kelâm edip zikr olunan Plişişte karyesinde vâki‘ bir tarafdan Topal Fano nâm zimmî ve bir tarafdan kendi tarlamız ve bir tarafdan kenîse ve bir tarafdan tarîk-i âm ile mahdûd bir cedîd oda ve bir yazlık dam ve iki samanlığı müştemil mülk menzil ve derûn-ı menzilde mevcûd esâs-ı beyt ve bakır evânî ve koyun ve sığır ve ma‘lûmü’l-hudûd harman yeri ve bostan yeri ve bağlar ve çayırlar ve arz-ı mîrî üzerinde vâki‘ çift ve çubuk ve kalîl ü kesîr ve celîl ü hakīr sâir emlâk ve eşyânın dört hissede bir hissesi ceddim merkūm Lazari’den bana mevrûs olup ve bir hissesi dahi karındaşlar olan merkūmân diğer Kiko ve Perendo’nun cedleri Koko nâm zimmîden babaları Petlo’ya ve ondan kendülere mevrûs olup ve bir hissesi dahi kezâlik karındaşları olan merkūmân Draçko ve Tanaş’ın cedleri merkūm Koko’dan babaları Koko’ya ve ondan kendülere mevrûs olup ve bir hissesi dahi kezâlik merkūm Koko’nun ceddi mersûm Koko’dan babası Peşo’ya ve ondan kendüye mevrûs olmağla menzil-i mezbûr ile sâir emlâk ve eşyâ ve bağ ve çift ve çubuk ve hayvânât ilâ hâzihi’l-ân dört hisse olmak üzere zabt ve tasarrufumuzda olmağın merkūm diğer Kiko ve Perendo ve Draçko ve Tanaş ve Kiko’dan suâl olunup takrîrleri tahrîr ve kıbel-i şerî‘at-ı garrâdan hüccet-i şer‘iyye tastîr olunması murâdımdır dedikde gıbbe’s-suâl merkūmûn diğer Kiko ve Perendo ve Draçko ve Tanaş ve Kiko cevâblarında fi’l-vâki‘ menzil-i mahdûd-ı mezbûr ile derûnunda olan esâs-ı beyt ve bakır evânî ve bağ ve bahçe ve çift ve çubuk ve hayvânât ve kalîl ü kesîr ve celîl ü hakīr sâir emlâk ve eşyâ ber-vech-i muharrer dört hisse olmak üzere iştirâken mülk-i mevrûsları olmağla ilâ-hâzihi’l-ân minvâl-i muharrer üzere zabt ve tasarruf eylediklerini her biri ikrâr ve i‘tirâf etmeğin işbu vesîka-i enîka hıfzan li’l-makāl kıbel-i şerî‘at-ı garrâdan sebt olundu.
Fî-selh-i Cemâziyelâhir li-sene 1137.
Şuhûdü’l-hâl: Bektaş Beşe b. Süleyman, Hüseyin Beşe b. Abdullah, Hasan Beşe b. Hüseyin, Hasan Beşe b. Mustafa, Yusuf Beşe b. Hüseyin, Hüseyin Beşe b. Ali, diğer Bektaş Beşe b. Hasan, Kethüda Molla Ahmed b. Ahmed, Ali Beşe b. Murad.
|