Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 87 Hüküm no: 48 Orijinal metin no: [6a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nazlı bt. Serkis isimli Ermeniye ile Zeynel bt. Salamon ve Rafeka v. Lini’nin alacak davasında sulh oldukları Mahrûse-i Galata a‘mâlinden İstinye nâhiyesine tâbi‘ Boğazkesen hisârı mahallâtından Arpaemini mahallesinde sâkine Nazlı bt. Serkis nâm Ermeniye meclis-i şer‘de Zeynel bt. Salamon ile kebîre kızları Rafeka ve Boni bt. Yeşov nâm Yahûdiyeler muvâcehelerinde ikrâr ve takrîr-i kelâm edip ben merkūmetân Rafeka ve Zeynel yedimden iştirâ ve kabz eyledikleri yirmi dört ipekli gömlek ve iki top bez ve altmış dirhem çift işi evânî sîmiyye ve bir inci enselik ve üç elvânî peşkülü ve cedîd yemenî yorgan ve eşyâ-yı sâire-i ma‘lûme semenlerinden zimmetinizde cem‘an yüz kırk guruş hakkım vardır deyü ba‘de’d-da‘vâ ve’l-inkâr müdde‘âmı beyâna adem-i kudretimden Yahûdiyetâ-ı merkūmetânı tahlîf sadedinde iken beynimize muslihûn tavassut edip beni merkūmetân Rafeka ve Zeynel ile da‘vâ-yı mezkûremden merkūmetâna bâ-hüccet-i şer‘iyye cihet-i deyn-i şer‘îden zimmetimde deynim olan bin beş yüz akçeden mâ‘adâ bana yirmi guruş dahi vermek üzere inşâ-i akd-i sulh eylediklerinde ben dahi ber-vech-i muharrer sulh-i merkūmu kabûl ve bedel-i sulh olan meblağ-ı mezbûru yedlerinden tamâmen alıp kabz eylediğimden sonra ben eşyâ-yı merkūmenin aynlarına ve semenleri olan meblağ-ı mezbûr yüz kırk guruşa vesâire müte‘allika âmme-i da‘vâdan Yahûdiyân-ı merkūmetân Zeynel ve Rafeka’nın zimmetlerini ibrâ-i âmm-ı kātı‘u’n-nizâ‘la ibrâ ve ıskāt eylediğimde onlar dahi bedel-i sulh olan meblağ-ı mezbûr bin beş yüz akçe ile yirmi guruşa ve merkūme Boni Yahûdi’ye dahi benden tasaddî eylediği sakat da‘vâsına ve târih-i vesîkaya gelince sâir beynimizde cereyân eden ahz u i‘tâ ve mu‘âmelât-ı şettâya müte‘allika âmme-i da‘vâdan her biri kezâlik benim zimmetimi ibrâ ve ıskāt eylediler dedikde merkūmât Zeynel ve Rafeka ve bundan her biri dahi mukırra-i merkūme Nazlı’yı ikrâr-ı meşrûhunda vicâhen ve şifâhen tahkīk ve tasdîk etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis ve’l-ışrîn min-Cemâziyelâhir li-sene 1137. Şuhûdü’l-hâl: Veli Çavuş b. Ömer, Boşnak Ahmed b. Mustafa, Ahmed Efendi b. Süleyman, Mehmed b. Ahmed, Ali b. Ahmed ve gayrühum.