Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 782 Hüküm no: 1021 Orijinal metin no: [121a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hamamcı Osman b. Abdülmennân’ın bahçe ve evini Aslan v. Samarya’ya sattığı Husûs-ı âti’l-beyânın mahallinde tahrîri iltimâs olunmağın savb-ı şer‘-i celîl-i lâzımü’t-tebcîlden mevlânâ Ömer Efendi b. İsmail irsâl olunup ol dahi Dârü’l-hilâfeti’l-aliyye Kostantıniyye el-mahmiyye mahallâtından Kasab İvaz mahallesinde sâbıkan zağarcıbaşı olan umdetü’l-emâcid ve’l-ekârim câmi‘ü’l-mehâmid ve’l-mekârim Osman Ağa b. Ahmed’in menziline varıp zeyl-i rakīmde isimleri terkīm olunan müslimîn mahzarlarında akd-i meclis-i şer‘-i mübîn eyledikde mahmiye-i mezbûrda Dülgerzâde mahallesi sâkinlerinden Hamamcı Osman b. Abdülmennân nâm kimesne meclis-i ma‘kūd-ı mezbûrda medîne-i Ebî Eyyûb-i Ensârî -radiye anhü’l-Bârî-’ye tâbi‘ kasaba-i Hasköy’de sâkin Yahud tâifesinin Badanacılar cemâ‘atinden Nesimi demekle ma‘rûf Aslan v. Samarya nâm Yahudi muvâcehesinde bi’t-tav‘i’s-sâf ikrâr ve i‘tirâf edip mukaddemâ mezbûr Nesimi Aslan’dan iki bin kıt‘a esedî guruş semen-i makbûza iştirâ etmekle bey‘-i âti’z-zikrin sudûruna değin yedimde mülküm ve hakkım olup kasaba-i mezbûre mahallâtından Keçeci Hacı Mehmed mahallesinde vâki‘ bir tarafdan İsterola ve bir tarafdan Kamarga oğlu Menahem ve bir tarafdan Hekim David nâm Yahudiler mülkleri ve bir tarafdan vâdi ile mahdûd fevkānî üç bâb oda ve bir matbah ve tahtânî üç bâb oda ve bir matbah ve müşterek üç aded su kuyusu ve hakk-ı mürûru ile sagīr ve kebîr iki kapı ve tûlen ve arzen bi hesâb-ı terbî‘î dört yüz zirâ‘ eşcâr-ı müsmire ve gayr-ı müsmireyi muhteviye hadîkayı ve frengî sülügen kârhânesini müştemil menzili tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile iki bin yüz yirmi kıt‘a esedî guruşa merkūm Nesimi Aslan’a bey‘ ve teslîm edip ol dahi iştirâ ve kabûl ve tesellüm eyledikden sonra semeni olan meblağ-ı mezbûr iki bin yüz yirmi kıt‘a esedî guruşu işbu meclisde merkūm Nesimi Aslan yedinden tamâmen ahz u kabz eyledim, ba‘de’l-yevm menzil-i mahdûd-ı mezkûr cemî‘ tevâbi‘ ve levâhıkı ve âmme-i hukūk ve merâfıkı ile merkūm Nesimi Aslan’ın mülk-i müşterâsı olmuştur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î husûs-ı mezbûru mevlânâ-yı merkūm mahallinde tahrîr ba‘dehû ma‘an irsâl olunan Hasan Çelebi ile meclis-i şer‘-i hatîre gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Umdetü’l-emâsil ve’l-a‘yân Vanlı Mustafa Ağa b. İsmail, fahrü’l-ekfâ es-Seyyid Mehmed Ağa b. es-Seyyid Mustafa Bezzâzistânî, hazînedâr Ali Çelebi b. Ahmed, Mirza Çelebi b. Abdullah, Mehmed Çelebi b. Osman, Musa Halîfe b. ( ), Mahmud Çelebi b. Abbas, Kefeli Hoca Mustafa b. Mehmed, Musa b. Hüseyin.