Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 783 Hüküm no: 1022 Orijinal metin no: [121a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aslan v. Samarya’nın, yahudihanesini Zağarcıbaşı Osman Ağa’ya sattığı Husûs-ı âti’l-beyânın mahallinde tahrîri iltimâs olunmağın savb-ı şer‘-i celîl-i lâzımü’t-tebcîlden mevlânâ Ömer Efendi b. İsmail irsâl olunup ol dahi Dârü’l-hilâfeti’l-aliyye Kostantıniyye el-mahmiyye mahallâtından Kasab İvaz mahallesinde sâbıkan zağarcıbaşı olan umdetü’l-emâcid ve’l-ekârim câmi‘ü’l-mehâmid ve’l-mekârim Osman Ağa b. Ahmed’in menziline varıp zeyl-i rakīmde isimleri terkīm olunan müslimîn mahzarlarında akd-i meclis-i şer‘-i mübîn eyledikde medîne-i Hazret-i Ebî Eyyûb-i Ensârî -radiye rabbühü’l-Bârî’ye tâbi‘, kasaba-i Hasköy mahallâtından Keçeci Mehmed mahallesi sâkinlerinden olup Yahud tâifesinin Badanacılar cemâ‘atinden olan Nesimi demekle ma‘rûf Aslan v. Samarya nâm Yahudi meclis-i ma‘kūd-ı mezbûrda mûmâ-ileyh Osman Ağa mahzarında bi’t-tav‘i’s-sâf ikrâr ve i‘tirâf edip zikr olunan [121b] Keçeci Hacı Mehmed mahallesinde vâki‘ bir tarafdan İsterola ve bir tarafdan Kamarga oğlu Menahem ve bir tarafdan Hekim David nâm Yahudiler mülkleri ve bir tarafdan vâdi ile mahdûd fevkānî üç oda ve bir sofa ve bir matbah ve tahtânî dört oda ve iki matbah ve bir sofa ve altlarında bir sarı bo[ya] kârhânesi ve zât-ı eşcâr-ı müsmire ve gayr-ı müsmire iki kıt‘a cüneyne ve bir frengî sülügen fırını ve bir tatlı su kuyusu ve mu‘allim Peşva v. Mihas nâm Yahudi ile müşterek üç su kuyusu ve iki sokak kapısını müştemil mülk Yahudihânemi tarafeynden îcâb ve kabûlü hâvî bey‘-i bâtt-ı sahîh-i şer‘î ile üç bin altı yüz kıt‘a esedî guruşa müşârün-ileyh Osman Ağa’ya bey‘ ve teslîm edip ol dahi iştirâ ve tesellüm eyledikden sonra semeni olan meblağ-ı mezbûr üç bin altı yüz kıt‘a esedî guruşu mûmâ-ileyh Osman Ağa yedinden işbu meclisde tamâmen alıp kabz eyledim ba‘de’l-yevm zikr olunan yahudihâne müşârün-ileyh Osman Ağa’nın mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î husûs-ı mezbûru mevlânâ-yı merkūm mahallinde tahrîr ba‘dehû ma‘an irsâl olunan Hasan Çelebi b. Bayram ile meclis-i şer‘-i hatîre gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min [şehri] Ramazâni’l-mübârek li sene seb‘a ve seb‘în ve elf. Şuhûdü’l-hâl: Es-Sâbikūn.